لاہور(نمائندہ خصوصی) پشاور زلمی کے نوجوان وکٹ کیپر بیٹر محمد حارث نے کہا ہے کہ میرا ابھی کوئی ہیرو نہیں ہے، خود اپنا ہیرو بنوں گا،پی ایس ایل میں رمیز راجا کی تعریف سے بہت حوصلہ افزائی ہوئی، وہاب ریاض، شعیب ملک اور کامران اکمل بہت سپورٹ کر رہے ہیں۔محمد حارث نے پشاور زلمی کی جانب سے پی ایس ایل کے لاہور میں کھیلے جانے والے میچز میں ٹاپ آرڈر پر کھیلتے ہوئے غیر معمولی کارکردگی کا مظاہرہ کیا ہے اور سب کی توجہ حاصل کر لی۔محمد حارث کا کہنا ہے کہ مجھے توقع تھی کہ پی ایس ایل میں موقع ملا تو اچھا پرفارم کروں گا کیونکہ پی ایس ایل ایسا پلیٹ فارم ہے کہ جہاں اچھا پرفارم کریں تو ہر طرف سے پزیرائی ملتی ہے۔انہوں نے کہا کہ پشاور زلمی نے مجھے ہمیشہ سپورٹ کیا ہے، مجھے نکھارنے کے لیے بھی ساتھ رکھا تھا، اب موقع دیا تو پرفارمنس ہوئی اس پر چیئرمین پی سی بی رمیز راجا کی تعریف سے بہت حوصلہ افزائی ہوئی، میں متحرک ہوا کہ چیئرمین پی سی بی نے تعریف کی ہے تو اب مزید اچھا کرنا ہے۔محمد حارث کہتے ہیں کہ کپتان وہاب ریاض، شعیب ملک اور کامران اکمل بہت سپورٹ کر رہے ہیں۔
