اسلام آباد:اسپیکر قومی اسمبلی اسد قیصر نے کہا ہے کہ پاکستان اور افغانستان کی ترقی اور خوشحالی ایک دوسرے سے جڑی ہوئی ہے۔ افغانستان کی عوام کے ساتھ ہمارا خونی رشتہ ہے۔
پاکستان افغانستان مشترکہ چیمبر آف کامرس اینڈ انڈسٹری کی تقریب سے خطاب کرتے ہوئے ان کا کہنا تھاکہ پاکستان اور افغانستان کی ترقی اور خوشحالی ایک دوسرے سے جڑی ہوئی ہے۔ افغانستان کی عوام کے ساتھ ہمارا خونی رشتہ ہے۔ پاک-افغان پارلیمانی فرینڈ شپ گروپ کی ایگزیکٹو کمیٹی نے دوطرفہ عوامی سطح پر رابطوں میں تیزی لانے کے لیے اہم کردار ادا کیا ہے۔ پاک-افغان ٹرانزٹ ٹریڈ کو مستحکم بنانے کے لیے ایگزیکٹو کمیٹی نے قابل ستائش کردار ادا کیا۔
ان کا کہنا تھاکہ وزیراعظم پاکستان عمران خان افغانستان کے ساتھ تجارت اور ٹرانزٹ ٹریڈ کے فروغ کے لیے گہری دلچسپی رکھتے ہیں۔ افغانستان کے ساتھ ویزا پالیسی میں خصوصی نرمی کی گئی ہے۔ انہوں نے کہا طلباء کے لیے ویزہ پالیسی میں نرمی کے ساتھ ساتھ ویزا کی مدت میں اضافہ بھی کیا گیا ہے۔ انہو ں نے کہا افغان بھائیوں کی مشکلات میں پاکستان افغانستان کے شانہ بشانہ کھڑا ہے۔ افغانستان اور پاکستان کے مابین تجارت اور ٹرانزٹ ٹریڈ کی راہ میں حائل رکاوٹوں کو دور کرنے کے لیے تمام وسائل کو بروئے کار لایا جائے گا۔ خطے کی ترقی اور خوشحالی کے لیے دونوں ممالک کو مشترکہ حکمت عملی اپنانی ہو گی، افغانستان اور پاکستان نے ملکر آگے بڑھنا ہے۔
