سکھر (نمائندہ جسارت) سکھرمیں دوبھائیوں کے جھگڑے نے خاتون سمیت 6افراد کی جان لے لی ،مقتولین کی نعشیں اسپتال منتقل ،پولیس کی بھاری جمعیت نے علاقے کا کنٹرول سنبھال لیا ،علاقے میں خوف وہراس، سکھر ضلع کے تماچانی تھانہ کی حدود کے علاقے میں شیخ برادری کے دو بھائیوں میں درخت کاٹنے کے معاملے پر ہونے والے جھگڑے میں دونوں بھائیوں اور ان کے حمایتیوں نے ایک دوسرے پر جدید اسلحے سے فائرنگ کردی جس کے نتیجے میں پانچ افراد موقع پر۔گولیاں لگنے سے ہلاک ہوگئے جبکہ ایک خاتون زخمی ہوگئی فائرنگ کی اطلاع پر پولیس کی بھاری جمعیت نے علاقے میں پہنچ کر صورتحال پر کنٹرول کرلیا اور مقتولین کی نعشیں اور زخمی خاتون کو سول اسپتال سکھر پہنچایا جہاں پر خاتوں بھی زخموں کی تاب نہ لاتے ہوئے چل بسی ۔ایس ایس پی سکھر سنگھار ملک نے بھی جھگڑے میں 6 افراد کے قتل ہونے کی تصدیق کردی ہے ۔واقعہ کے بعد علاقہ میں خوف وہراس پھیل گیا جبکہ پولیس کی بھاری جمعیت علاقے میں موجود ہے مقتولین میں تین سگے بھائی بتائے جاتے ہیں مقتولین کی شناخت مسمات نسرین ،غلام نبی ،غلام اکبر ،غلام محمد ،پرویز اور اویس کے ناموں سے کی گئی ہے سول اسپتال سکھر میں مقتولین کا پوسٹ مارٹم جاری ہے۔
