لاہور (سید وزیر علی قادری) وینیو بدلا مگر ملتان سلطانز کی پی ایس ایل 7 میں جیت کی روایت نہ بدلی۔ دفاعی چیمپئن ملتان سلطانز نے پی ایس ایل 7 کے دوسرے مرحلے کے
پہلے میچ میں پشاور زلمی کو 42 رنز کے بھاری مارجن سے شکست دے کر ٹورنامنٹ میں مسلسل چھٹی کامیابی حاصل کرلی ہے۔ دفاعی چیمپئن اب تک ٹورنامنٹ میں ناقابل شکست ہے۔ قذافی اسٹیڈیم لاہور میں کھیلے گئے میچ میں پشاور زلمی کی پوری ٹیم 183 رنز کے تعاقب میں 140 رنز پر ڈھیر ہوگئی۔ فاسٹ بولر بلیسنگ مزاربانی نے 18 رنز کے عوض 3 کھلاڑیوں کو پویلین کی راہ دکھائی۔خوشدل شاہ نے بھی 3 اور شاہنواز دھانی نے 2 وکٹیں حاصل کیں۔ مطلوبہ ہدف کے تعاقب میں پشاور زلمی کے 5 بیٹرز ہی ڈبل فگرز میں داخل ہوسکے۔
