جناح کلب بدر جعفری کرکٹ ٹورنامنٹ کے کوارٹر فائنل میں

کراچی (اے پی پی)جناح کرکٹ کلب بدر جعفری انویٹیشن کرکٹ ٹورنامنٹ کے کوارٹر فائنل میں پہنچ گئی۔ زیڈ اے اسپورٹس کے زیر اہتمام منعقدہ بدر جعفری انویٹیشن کرکٹ ٹورنامنٹ میں جناح کرکٹ کلب نے نیو سنگم کرکٹ کلب کو5 وکٹوں سے شکست دیکر کوارٹر فائنل تک رسائی حاصل کرلی۔ ایسٹرن اسٹار کرکٹ گرائونڈ پر کھیلے گئے میچ میں نیو سنگم کرکٹ کلب نے پہلے بیٹنگ کرتے ہوئے مقررہ 40 اوورز میں 9 وکٹوں کے نقصان پر 179 رنز اسکور کئے، عرفان علی خان نے 54 اور غضنفر یار غنی نے 28 رنز اسکور کئے۔ جناح کرکٹ کلب کی جانب سے محمد سفیان، زین کامران شیخ نے2,2 کھلاڑیوں کو آئوٹ کیا۔ جواب میں جناح کرکٹ کلب نے مطلوبہ ہدف 183 رنز 31.2 اوورز میں 5 وکٹوں کے نقصان پر پورا کرلیا۔ شہریار گل جدون نے 52 ، زین کامران شیخ نے 36 ، اسلام شیخ نے ناقابل شکست 41 اور دانیال شنواری نے ناقابل شکست 25 رنز اسکور کئے۔