کراچی(اسٹا ف رپورٹر)نیشنل اسٹیڈیم میں (آج)جمعرات27 جنوری سے شروع ہونے والے پی ایس ایل 7 کے میچز کے سلسلے میں سیکورٹی ڈویژن کی جانب سے جامع سیکورٹی پلان مرتب کر لیاگیا،مجموعی طورپر5ہزار650اہلکارسیکورٹی فرائض انجام دیں گے ،ٹیموں کی نقل وحرکت کے دوران فضائی نگرانی بھی کی جائے گی ، عوام کی سہولت کو مد نظر رکھتے ہوئے سر شاہ سلیمان روڈ کے ایک ٹریک کے علاوہ تمام سڑکیں کھلی رہیں گی۔ترجمان سیکورٹی ڈویژن کے مطابق نیشنل اسٹیڈیم کراچی میں کھیلے جانے والے پی ایس ایل میچز کی سیکورٹی کے لیے مجموعی طورپر5ہزار650اہلکارسیکورٹی پرمامورہوںگے،ایس ایس یو کے1200 کمانڈوز سمیت سیکورٹی ڈویژن کے1700اہلکار فرائض انجام دیں گے، ٹریفک پولیس کے 1500، اسپیشل برانچ کے500،ریپڈ رسپانس فورس کے 250اہلکارتعینات کیے جائیں گے،سندھ رینجرزکے جوان اور دیگر قانون نافذ کرنے والے ادارے کے اہلکاربھی سیکورٹی فرائض انجام دیں گے ،اہلکارنیشنل اسٹیڈیم، کراچی ائرپورٹ، روٹس، پریکٹس گرائونڈ، پارکنگ پوائنٹس، ہوٹلز اور دیگر مختلف جگہوں پر تعینات ہوںگے،ماہر نشانہ باز بھی اہم مقامات پر تعینات کیے جائیں گے، کمانڈ اینڈ کنٹرول بس اسٹیڈیم کے اطراف کی نگرانی کے لیے نیشنل اسٹیڈیم پرتعینات کی جائے گی، اسپیشل ویپن اینڈٹیکٹکس ٹیم کسی بھی ہنگامی صورتحال سے نمٹنے کے لیے ایس ایس یوہیڈکوارٹرزمیں الرٹ رہے گی، کرکٹ شائقین کو شٹل بس سروس کے ذریعے پارکنگ پوائنٹس سے اسٹیڈیم تک لایا جائے گا، شائقین کی رہنمائی کے لیے ٹریک سوٹ میں ملبوس ایس ایس یوکمانڈو زپارکنگ پوائنٹس سے انکلوژتک ان کی رہنمائی کریں گے،اسٹیڈیم کے احاطے میں سی این جی سلینڈر نصب گاڑیوں کے داخلے پر سخت پابندی ہوگی، نیشنل اسٹیڈیم آنے والے شائقین کے لیے حکیم سعید گرائونڈ بیت المکرم مسجد یونیورسٹی روڈپارکنگ پوائنٹ مختص کیا گیا ہے جبکہ وی آئی پیز کے لیے نیشنل کوچنگ سینٹر سے ملحقہ چائنہ گرائو نڈمیں انتظام کیا گیا ہے،شائقین کو اپنی شناخت ثابت کرنے کے لیے قومی شناختی کارڈ اپنے ہمراہ لازمی رکھنا ہوگا، شائقین سے درخواست کی گئی ہے کہ وہ لمبی قطاروں میں انتظار سے بچنے کے لیے اسٹیڈیم میں وقت سے پہلے پہنچیں ،12 سال سے زائد عمر کے افراد کے لیے کورونا ویکسی نیشن لازمی کرانا ہوگی، اسٹیڈیم میں داخلے سے پہلے شائقین کو ویکسی نیشن سرٹیفکیٹ پیش کرنا ہو گا،اسٹیڈیم میں داخلے کے وقت ماسک پہننا لازمی ہوگا، این سی او سی کے منظور کردہ ضوابط کی خلاف ورزی کی صورت میں اسٹیڈیم سے باہر نکال دیا جائے گا،سیکورٹی پلان کے تحت آتشی اسلحہ، کھلونا بندوقیں، دھماکا خیز مواد، پٹاخے، سگریٹ، ماچس، لائٹر، چاقو، دھات وغیرہ اسٹیڈیم کے اندر لے جانے کی اجازت نہیں ہوگی، کسی بھی بینر،پوسٹر،پلے کارڈ جس پر مذہب یا نسل کی بنیاد پر امتیازی سلوک یا فحش باتیں درج ہوں کی سختی سے ممانعت ہوگی، تماشائیوں کوگرائونڈ، فنکاروں اور ساتھی تماشائیوں پرکسی قسم کی چیز پھینکنے کی اجازت نہیں ہوگی۔
