اسلام آباد(آن لائن )سابق صدرو پی پی چیئرمین آصف زرداری اور سربراہ پی ڈی ایم مولانا فضل الرحمن کے درمیان سیاسی رابطے بحال ہونا شروع ہوگئے۔ذرائع کے مطابق آصف زرداری کی فون کے ذریعے فضل الرحمن سے سیاسی تعاون پر گفتگو ہوئی ہے۔ مولانا فضل الرحمن نے گفتگو میں گلے شکوے کیے اور کہا کہ پیپلزپارٹی ہمیشہ بے وفائی کرجاتی ہے۔ فضل الرحمان نے مشرف دور اور سینیٹ الیکشن میں پیپلزپارٹی کے رویے کا شکوہ کیا اور ساتھ ہی پی ڈی ایم کی تحریک کی ناکامی بھی پیپلزپارٹی کے کھاتے میں ڈالی۔دوسری جانب آصف زرداری نے استعفوں کی شرط کو پی ڈی ایم کی ناکامی سے تعبیر کیا۔بعد ازاں آصف زرداری اور فضل الرحمن میں رابطے جاری رکھنے کا بھی فیصلہ کیا گیا ہے۔
