لاہور (نمائندہ جسارت) پیپلز پارٹی کی رہنما اور رکن قومی اسمبلی شازیہ مری نے کہاہے کہ تحریک انصاف سے جب سوال پوچھا جائے تو صبح و شام نامناسب بات کرتے ہیں،عمران خان کی حکومت سب سے زیادہ کرپٹ ہے،تبدیلی نہیں تباہی لے کر آئی ہے، وزیراعظم عمران خان ہاتھ جوڑیں اور عوام سے معافی مانگیں، اس سے پہلے کہ عوام حکمرانوں کے گریبانوں تک آ پہنچیں ، عمران خان عوام کو دیوار سے لگانے کی ساری سازشیں اب بند کریں۔منگل کو شازیہ مری نے فیصل کریم کنڈی کے ساتھ پریس کانفرنس کرتے ہوئے کہا کہ وزیراعظم عمران خان خود دھاندلی سے اقتدار میں آئے ہیں اور پیپلز پارٹی کو باتیں کرتے ہیں، پیپلز پارٹی نے الیکشن کمیشن پارٹی فنڈنگ کے حوالے سے تمام ریکارڈ جمع کرائے ہیں جبکہ تحریک انصاف نے 77 میں سے صرف 2اکائونٹس کا ریکارڈ الیکشن کمیشن میں جمع کرایا۔ انہوں نے کہا کہ تحریک انصاف سے جب سوال پوچھا جائے تو صبح و شام گالیاں دیتے ہیں،ان سے ان کی اولادوں کا پوچھتے ہیں، اکائونٹس کا پوچھتے ہیں تو وہ کہانیاں سنانے لگ جاتے ہیں۔
