کراچی (سید وزیر علی قادری)چند روز قبل ڈھاکا، بنگلادیش میں اختتام ہونے والی ہاکی چیمپئز ٹرافی میں شرکت کے بعد پاکستان ہاکی ٹیم وطن واپس پہنچ گئی۔مصلحت کا شکار ، ٹیم کی ناقص کارکردگی اور چوتھی پوزیشن جیسے چبتے سوالات کے جوابات دینے سے بچنے کے لیے قومی ٹیم کی آمد کو صیغہ راز رکھا گیا ۔ ذرائع کے مطابق پاکستان ہاکی ٹیم ایشیائی ایونٹ میں شرکت کے بعد کراچی آئی چند گھنٹے ایدھی ہاکی اسٹیڈیم میں قیام کیا اور پھر کھلاڑی اپنے اپنے گھروں کو روانہ ہوگئے۔ اس پورے عمل میں قومی فیڈریشن کے حکام غائب رہے اور صحافیوں کے استفسار کے باوجود میڈیا ڈیپارٹمنٹ نے کوئی علم نہیں کہہ کر چپ ساد ھ لی۔ دریں اثنا نومنتخب کھلاڑیوں کا جونیئر عالمی کپ اور ایشین چیمپینز ٹرافی میں شرکت کے بعد اپنے آبائی شہروں میں آمد پر شاندار استقبال کیا گیا، قومی ہاکی ٹیم کے کھلاڑیوں محمد عبداللہ کا خوشاب،راؤ عقیل احمد کا کوہی والہ اور عبداللہ اشتیاق کا وہاڑی میں جلوس کی شکل میں استقبال کیا گیا اور پھولوں کے ہار پہنا کر شہر میں موٹر سائیکل ریلیوں کے ہمراہ گشت کرایا گیا۔
