بینظیر بھٹو کی برسی میں شرکت کیلیے قافلوں کی روانگی جاری

کراچی (نمائندہ جسارت) سابق وزیراعظم بینظیر بھٹو کی 14ویں برسی میں شرکت کیلیے کراچی سے پیپلز پارٹی کے قافلوں کی گڑھی خدابخش کیلیے روانگی شروع ہوگئی،
پیپلزپارٹی کراچی ڈویژن کے صدر صوبائی وزیر اطلاعات سعید غنی، پیپلزپارٹی سندھ کے جنرل سیکرٹری وقار مہدی نے قافلوں کو روانہ کیا، پی پی آزاد کشمیرکے رہنماؤں کے علاوہ سابق وزیراعظم راجا پرویز اشرف اور پارٹی کی اہم شخصیات بھی کراچی پہنچنے کے بعد گڑھی خدابخش روانہ ہوگئیں۔ پیپلزپارٹی کراچی کے ڈپٹی سیکرٹری انفارمیشن آصف خان کے مطابق کراچی کے تمام اضلاع سے شہید بے نظیربھٹو کی برسی میں شرکت کیلیے قافلوں کی روانگی اتوار کو بھی جاری رہے گی۔ سابق وزیر اعظم بینظیر بھٹو کی برسی27دسمبر کو لاڑکانہ گڑھی خدابخش میں منائی جائے گی، پیپلزپارٹی بھرپور سیاسی طاقت کا مظاہرہ کرے گی، سعید غنی کا کہنا ہے کہ پارٹی چیئرمین بلاول زرداری جلسہ عام سے خطاب اور جاری حکومت مخالف تحریک کے سلسلے میں پارٹی کے آئندہ کے لائحہ عمل کا اعلان کریں گے۔