بدرجعفری کرکٹ،آغاخان اورقذافی جم خانہ کی کامیابی

کراچی (اسٹاف رپورٹر)بدر جعفری انویٹیشن کرکٹ ٹورنامنٹ میں آغا خان جمخانہ اور قذافی جمخانہ نے اپنے اپنے میچوں میں کامیابیاں حاصل کرلی ہیں۔ زیڈ اے اسپورٹس کے زیر اہتمام آغا خان جمخانہ گرائونڈ میں کھیلے گئے پہلے میچ میں آغا خان جمخانہ نے مجاہد جمخانہ کو باآسانی 137 رنز سے شکست دی۔ آغا خان جمخانہ نے پہلے بیٹنگ کرتے ہوئے مقررہ 40اوورز میں سات وکٹوں کے نقصان پر 284رنز بنائے، سابق فرسٹ کلاس کرکٹر جاوید منصور نے 76، سید احسان اللہ نے 74 اور میر افضل بیگ نے 65 رنز اسکور کیے۔ ہدف کے تعاقب میں مجاہد جمخانہ کی پوری ٹیم 29.3 اوورز میں 147رنز بناکر آئوٹ ہوگئی۔ سکندر حسن نے 32 ، ولی خان نے 29 اور سفیان خان نے 27 رنز اسکور کیے۔ آغا خان جمخانہ کے عادل رحمت اور کامران ولی نے دو دو کھلاڑیوں کو آئوٹ کیا۔ راشد لطیف کرکٹ اکیڈمی گرائونڈ پر کھیلے گئے دوسرے میچ میں قذافی جمخانہ نے کراچی ویسٹ کرکٹ کلب کو پانچ وکٹوں سے شکست دیدی۔ کراچی ویسٹ کرکٹ کلب کی پوری ٹیم پہلے بیٹنگ کرتے ہوئے 30.4 اوورز میں 168رنز بناکر آئوٹ ہوگئی، نعمان احسن خان نے 47 ، کامران احمد نے 29 اور وسیم خان نے 21 رنز اسکور کیے۔ قذافی جمخانہ کے محمد ارسلان ، تابش نواب اور ظفر خان نے دو دو کھلاڑیوں کو آئوٹ کیا۔ جواب میں قذافی جمخانہ نے مطلوبہ ہدف 170 رنز 26.2 اوورز میں 5 وکٹوں کے نقصان پر پورا کرلیا۔ محمد ارسلان انصاری نے 41 ، تابش نواب نے 29 ناٹ آئوٹ ، نادر انصاری نے 25 ، اسد مبین نے 20 رنز ناٹ آئوٹ اسکور کیے۔