اسلام آباد: وفاقی وزیر منصوبہ بندی اسد عمر نے کہا ہے کہ حکومت کے موثر اقدامات کی وجہ سے گردشی قرضے میں کافی حد تک کمی ہوئی ہے، حکومت ملک میں پاور سیکٹر میں اصلاحات لارہی ہے،حکومت معاشرے کے کمزور طبقات کے تحفظ،ڈھانچہ جاتی اصلاحات پر توجہ دے رہی ہے، حکومت شماریات کے نظام کو جدید بنانے کیلئے کام کررہی ہے۔
تفصیلات کے مطابق اسد عمر سے عالمی بینک کے جنوبی ایشیا کیلیے ڈائریکٹر گوانگزی چن نے ملاقات کی، ملاقات میں عالمی بینک کی معاونت سے چلنے والے منصوبوں پر بات چیت ہوئی۔
وزیر منصوبہ بندی نے پاکستان کی سماجی و اقتصادی ترقی میں عالمی بینک کے تعاون کو سراہا، اسد عمر نے کہاکہ موجودہ حکومت عالمی بینک مختلف منصوبوں کو تیزی سے آگے بڑھانے کیلیے پر عزم ہے، حکومت کے موثر اقدامات کی وجہ سے گردشی قرضے میں کافی حد تک کمی ہوئی ہے۔
انہوں نے یقین دہانی کرائی کہ حکومت ملک میں پاور سیکٹر میں اصلاحات لارہی ہے،حکومت معاشرے کے کمزور طبقات کے تحفظ، ڈھانچہ جاتی اصلاحات پر توجہ دے رہی ہے، سماجی اخراجات کے تحفظ اور سماجی تحفظ کے نیٹ ورک کو فروغ دینے کے لیے پوری طرح پرعزم ہے۔
وزیر منصوبہ بندی نے بجلی کے ترسیلی نظام کی توسیع اور جدیدیت کے لیے عالمی بینک کی معاونت کی اہمیت پر مزید زور دیا، اسدعمر نے کہاکہ حکومت شماریات کے نظام کو جدید بنانے کیلیے کام کررہی ہے۔
