سعودی عرب سے اظہار محبت اور یکجہتی کے طور پر یوم الوطنی کے موقع پر پاکستان قونصلیٹ جنرل جدہ اور پاک میڈیا جرنلسٹس فورم کے درمیان آزادی کپ نمائشی کرکٹ میچ کھیلا گیا جو پاکستان قونصلیٹ نے 7 وکٹوں سے جیت لیا۔پاک میڈیا کے کپتان چیئرمین پاک میڈیا گروپ جہانگیر خان نے ٹاس جیت کر پہلے بیٹنگ کرنے کا فیصلہ کیا اور مقررہ اوورز میں 92 رنز بنائے۔ فہد نے عمدہ بیٹنگ کی۔ جواب میں قونصلیٹ کی ٹیم نے مطلوبہ ہدف 3 وکٹوں کے نقصان پر پورا کر لیا۔
قونصلیٹ کی جانب سے محمد رمیز 48 رنزبناکرناقابل شکست رہے اورمیچ کے بہترین کھلاڑی قرار پائے۔ پاک میڈیا کی جانب سے حافظ عرفان نے 3 وکٹیں حاصل کیں اور بہترین بالر کا ایوارڈ حاصل کیا۔ قونصلیٹ کی ٹیم میں قونصل جنرل خالد مجید سمیت دیگر افسران جبکہ پاک میڈیا کی ٹیم میں فورم کے ذمے داران شامل تھے۔
مہمان خصوصی قونصل جنرل خالد مجید نے دونوں ٹیموں کو مبارکباد پیش کرتے ہوئے ٹورنامنٹ کو سعودی بھائیوں کے نام کیا اور ٹورنامنٹ میں اہم کردار ادا کرنے پر چیئرمین پاک میڈیا جہانگیرخان اورکمیونٹی ویلفیئر قونصلر ماجد میمن کو خصوصی مبارکباد دی۔ آخر میں تقریب تقسیم انعامات منعقد ہوئی، جس میں پاکستانی کاروباری شخصیات آمنہ علی، نذیر احمد کمپنی، تیمور ملک، ادعیہ وہاج، علی جاوید، ندا عدنان، نصرت جبین، سید عظیم حیدر، مراد عبدالقادر النزولی اور دیگرکی جانب سے کھلاڑیوں اور مہمانوں کو خصوصی تحفے دیے گئے۔
آخر میں پاک میڈیا ٹیم منیجر ملک شہزاد نے اپنے تاثرات میں کہا کے ہار جیت کھیل کا حصہ ہے۔ امید ہے ٹیم آئندہ اپنی پرفارمنس بہتر بنائے گی۔ صدر پاک میڈیا چودھری نورالحسن گجر اور چیئرمین جہانگیر خان نے تمام مہمانوں اوراسپانسرز کا شکریہ ادا کیا۔ میچ میں کیمونٹی کی جن نمایاں شخصیات نے شرکت کی ان میں معروف سعودی میڈیا اور کاروباری شخصیت سمیرا عزیز، ملک شہزاد، بشیر خان سواتی، راجا بشیر، تنویرخان، ناصر حسین، ڈاکٹرامینہ خان اور دیگر بھی شریک ہوئے۔ میچ میں امپائرنگ کے فرائض مرزا محمود الحسن، وسیم شعیب ، بلال پیرزداہ نے انجام دیے۔
