کراچی (سید وزیر علی قادری)15ویںچیف آف دی نیول اسٹاف انٹرنیشنل اسکواش چمپئن شپ کا گزشتہ روزآغاز ہو گیا۔ روشن خان جہانگیر خان اسکواش کمپلیکس کراچی میں انٹرنیشنل ایونٹ میں پاکستان کے علاوہ4 مختلف ممالک سے تعلق رکھنے والے غیر ملکی کھلاڑی بھی شرکت کر رہے ہیں۔ کمانڈر پاکستان فلیٹ وائس ایڈمرل اویس احمد بلگرامی نے بطور مہمان خصوصی افتتاحی تقریب میں شرکت کی اور چمپئن شپ کے آغازکا اعلان کیا۔ چیف آف دی نیول سٹاف انٹرنیشنل اسکواش چیمپئن شپ کے دوران 24کھلاڑی اپنی صلاحیتوں کا لوہا منوائیں گے جن میں مصر، ہانگ کانگ، کویت، امریکا کے 15 بین الاقوامی کھلاڑی اور پاکستان کے9کھلاڑی شامل ہیں۔قبل ازیں ٹورنامنٹ ڈائریکٹر کموڈور کامران احمد نے افتتاحی خطاب میں کہا کہ پاک بحریہ گزشتہ دو دہائیوں سے چیف آف دی نیول اسٹاف اوپن اسکواش چمپئن شپ کا انعقاد کر رہی ہے۔ حالیہ چمپئن شپ میں کل 23 میچ کھیلے جائیں گے جن میں 4 کوارٹر فائنل، 2 سیمی فائنل اور ایک فائنل میچ شامل ہیں۔ ٹورنامنٹ ڈائریکٹر نے اس میگا ایونٹ میں تعاون اور موجودگی پر کھلاڑیوں، آفیشلز اور اسپانسرز کے جذبے کو سراہا۔ پہلے رانڈ کا افتتاحی میچ ہانگ کانگ کے میکس لی اور پاکستان کے ظاہر شاہ کے درمیان کھیلا گیا دلچسپ مقابلے کے بعد میکس لی میچ کے فاتح قرار پائے۔افتتاحی تقریب میں سول اور فوجی معززین، اسپانسرز اورا سکواش کے سینئر کھلاڑیوں نے شرکت کی۔
