کراچی (اسٹاف رپورٹر) پاکستان پیپلزپارٹی کے چیئرمین بلاول زرداری نے میلاد النبی پر فرزندان توحید و سنت کو مبارک باد دیتے ہوئے کہا ہے کہ 12 ربیع الاول دراصل وہ دن ہے کہ جب ہم اپنے پیارے نبی ؐ کی سیرت کے مطابق زندگی گزارنے کے عزم کو دہراتے ہیں، میڈیا سیل بلاول ہاؤس سے جاری اپنے پیغام میں انہوں نے کہا کہ محسن انسانیت حضور ؐ کی زندگی ہمارے لیے ایک رول ماڈل ہے جبکہ نبی کریم ؐ کی تعلیمات کا تقاضا ہے کہ ہم تمام اختلافات بھلا کر ایک امت بن جائیں، انہوں نے کہا کہ انسانیت کی فلاح کے لیے دنیا کو رحمت اللعالمینؐ کے اسوہ حسنہ کو مثال بنانا ہوگا، چیئرمین بلاول زرداری نے اپنے پیغام میں بتایا کہ پیغمبر اسلامؐ نے ایک ایسا سماج تشکیل دیا جس میں سب لوگوں کے لیے مساوی حقوق تھے اور ہمیں دنیا کے سامنے اپنے بہترین قول اور فعل سے ثابت کرنا ہوگا کہ ہم حضرت محمد مصطفی ﷺ کے سچے امتی ہیں۔
