کراچی ( اسٹاف رپورٹر)کے ایچ اے انٹر کلب ہاکی چمپین شپ کے پہلے دن تین میچز کے فیصلے ہوگئے، یازک کلب، کراچی گلیڈی ایٹر، بیچم ہاک کلب نے مخالف کو شکست دے دی، تفصیلات کے مطابق کراچی ہاکی ایسوسی ایشن کے اسپورٹس کمپلیکس گلشن اقبال کراچی میں جاری کے ایچ اے انٹر ہاکی کلب کے پہلے روز یازک ہاکی کلب نے سینٹرل فٹنس کلب کو 0-5 سے باآسانی زیر کرلیا، پہلے ہاف کے اختتام پر فاتح ٹیم کو ایک گول کی برتری حاصل تھی، دوسرے ہاف میں یازک کلب نے مخالف کے گول پوسٹ پر حملوں کا سلسلہ جاری رکھا جس کے باعث اس نے اپنی برتری مستحکم کرتے ہوئے صفر کے مقابلے میں پانچ گول سے کامیابی حاصل کرلی، دوسرے میچ میں کراچی گلیڈی ایٹر نے کورنگی ٹائگرز کو 1-6 سے شکست دیدی۔تیسرے میچ میں بیچم ہاکی کلب نے یونائیٹڈ جمخانہ کو 1-4 سے آؤٹ کلاس کردیا، پہلے ہاف کے اختتام پر فاتح ٹیم کو 0-2 کی برتری حاصل تھی، دوسرے ہاف میں ڈیفنس کی غلطیوں کے باعث بیچم کلب کو اپنی برتری میں اضافہ کرنے کا بھر پور موقع ملا۔جس کے باعث فاتح ٹیم کو چار گول کی سبقت حاصل ہوگئی، یونائیٹڈ کلب نے خسارہ کم کرنے کی کوشش جاری رکھی تاہم وہ ایک سے زیادہ گول نہ کرسکی، یونائیٹڈ کلب کا واحد گول ماریج امراؤ نے کیا۔
