لاہور (نمائندہ جسارت) پنجاب حکومت کے ترجمان فیاض الحسن چوہان نے کہا ہے کہ مولانا فضل الرحمان کو جان لینا چاہیے کہ شہباز شریف پچ کے دونوں طرف کھیلتے ہیں۔ گزشتہ روز کراچی میں پی ڈی ایم کے جلسے پر رد عمل میں انہوں نے کہا کہ ڈیڑھ سال سے شہباز شریف اور پی ڈی ایم کی بڑھکیں سن سن کر عوام کے کان پک چکے ہیں، یہی حکومت مخالف بڑھکیں پہلے بلاول زرداری اور بیگم صفدر اعوان مارتے تھے، طوطا اور مینا کی غیر موجودگی میں شہباز شریف نے بھی وہی کھوکھلی باتیں کیں، شہباز شریف کہتے ہیں کہ موقع ملا تو ملک کے تمام مسائل حل کریں گے، 40 سال پنجاب پر حکومت کرنے والوں کو ایک اور موقع کا انتظار انتہائی مضحکہ خیز بیان ہے، عوام باشعور ہو چکے، شہباز شریف کی حکومت کی خواہش صرف خواہش ہی رہے گی۔ انہوں نے مزید کہا کہ اپنی ہی سیٹ نہ جیت سکنے والے مولانا پی ڈی ایم کی قیادت کر رہے ہیں، حقیقت یہ ہے کہ سیاسی بے روزگار مولانا فضل الرحمان کے پاس پیسے ختم ہوچکے، پی ڈی ایم اور ن لیگ سے پیسے اینٹھنے کے چکر میں احتجاج کی کال دے رہے ہیں۔
