کراچی(اسٹاف رپورٹر)پاکستان باکسنگ فیڈریشن کے زیراہتمام انٹرنیشنل باکسنگ ڈے کے حوالے سے ملک بھر میں باکسنگ کے مقابلے، سیمینار ، ورکشاپ اور کورسز اختتام ہو گئے ۔ پاکستان باکسنگ فیڈریشن کے سیکرٹری جنرل کرنل (ریٹائرڈ) ناصر اعجاز تنگ نے بتایا کہ 27اگست کو دنیا بھر میں انٹرنیشنل باکسنگ ڈے منایا جاتا ہے اور اس سلسلے میں ملک بھر میں چاروں صوبوں سمیت آزاد جموں کشمیر، گلگت بلتستان، وفاقی دارالحکومت کے علاوہ ضلعی اور ڈویژن کی سطح پر میں بھی باکسنگ کے مقابلے منعقد کیے گئے۔انہوں نے کہا کہ اس دن کی مناسبت سے پاکستان باکسنگ فیڈریشن نے بھی فیڈریشن سے منسلک تمام اداروں، صوبائی اور ریجنل ایسوسی ایشنز کو ہدایات جاری کی تھیں کہ تمام متعلقہ ادارے اسی روز ضلعی اور ڈویژن کی سطح پر باکسنگ کے شیڈو اور شو بوٹ کے نمائشی مقابلے منعقد کروائیں، اس کے علاوہ اسی روز آن لائن باکسنگ سیمینار، ورکشاپ اور کورسز بھی منعقد کروائے گئے۔
