اٹک (صباح نیوز) صوبہ پنجاب کے ضلع اٹک میں مسافر وین خوفناک حادثے کا شکار ہوگئی۔ ریسکیو ذرائع کے مطابق غازی انٹر چینج کے قریب مسافر وین تیز رفتاری کے باعث الٹ گئی، حادثے میں6 افراد موقع پر ہی جاں بحق جبکہ8 زخمی ہوئے۔ ہلاک شدگان میں2 خواتین سمیت وین ڈرائیور بھی شامل ہے۔ واقعے کی اطلاع پر پولیس اور ریسکیو کی ٹیمیں جائے حادثہ پر پہنچ گئیں اور لاشوں اور زخمیوں کو ایوب میڈیکل کمپلیکس منتقل کردیا گیا، تاہم زخمیوں میں5 افراد کی حالت تشویشناک ہے۔ پولیس حکام کے مطابق حادثے کا شکار فیملی کا تعلق راولپنڈی چک شہزاد سے بتایا جارہا ہے، جاں بحق افراد اٹک سے رشتے دار کے نماز جنازہ میں شرکت کے لیے آرہے تھے۔
