سکھر (نمائندہ جسارت) سکھر کے سانگی اور دبر کے علاقوں میں جتوئی اور جاگیرانی برادری میں کشیدگی، فائرنگ کا تبادلہ، فائرنگ کے باعث مسافر ٹرین پنوعاقل اسٹیشن پر روک دی گئی۔ ریلوے ذرائع کے مطابق کراچی جانے والی عوام ایکسپریس کو عارضی طور پر روکا گیا، ممکنہ نقصان سے بچنے کے لیے ٹرین کو روکا گیا، پولیس طلب کرلی گئی، سانگی اور دبر کے علاقوں میں جتوئی اور جاگیرانی برادری کے لوگوں میں کشیدگی برقرار ہے۔ دونوں فریقین کے مسلح افراد کے درمیان وقفے وقفے سے فائرنگ کا سلسلہ جاری ہے۔ پولیس ذرائع کے مطابق فائرنگ میں دو افراد زخمی ہوئے جنہیں اسپتال منتقل کردیا گیا، کئی روز سے جاری کشیدگی کے باعث علاقے میں خوف و ہراس پایا جاتا ہے۔ پولیس نے بیس سے زائد افراد کو گرفتار کرلیا، فریقین میں ایک دوسرے کے افراد کو اغوا کر کے تذلیل کرنے پر کشیدگی شروع ہوئی۔
