اسلام آباد: حکومت نے تمام غیرملکیوں کو رجسٹرد کرنے کا فیصلہ کرلیا ہے اور بھارت سے کوئی بات نہیں ہوگی جب تک وہ 5 اگست کے اقدامات نہیں اٹھاتے، برہان وانی کی شہادت پر کشمیر میں آج جو ہوا اس کی مذمت کرتے ہیں۔
تفصیلات کے مطابق نیشنل فارنزک سائنس ایجنسی کے دورے کے موقع پر میڈیا سے بات کرتے ہوئے وزیرداخلہ شیخ رشید کا کہنا تھا کہ تمام غیر ملکیوں کو رجسٹرڈ کرنے کا فیصلہ کیا ہے، غیر ملکیوں کو ایلین کارڈ کےذریعے بینک اکاوَنٹس کھولنے کی اجازت ہوگی۔
انہوں نے کہا کہ افغانستان میں کورونا کا بہت مسئلہ ہے اور وہاں سنگین صورتحال ہے، طورخم بارڈر پر 4 سے 5 ہزار پھنسے افراد کو نکالنے کیلئے جلد لائحہ عمل طے کریں گے، طورخم بارڈر کو ویکسی نیشن کروانے کیلئے کھول رہے ہیں۔
وزیرداخلہ نے کہاہےکہ منشیات کی اسمگلنگ روکنے کےلیے بڑا اقدام کرنے جارہے ہیں، پاکستان سے بیرون ملک منشیات نہیں جاتی بلکہ وہاں سے ادھر آتی ہے۔
ان کا کہنا تھا کہ 70 سال میں 50 ہزار لوگ پاکستان داخل ہوئے جبکہ پاکستان میں داخل ہونے والے 40 سے 50 ہزار افراد کا کوئی ریکارڈ نہیں ہے۔
شیخ رشید کا کہنا تھا کہ بھارت سے کوئی بات نہیں ہوگی جب تک وہ 5 اگست کے اقدامات نہیں اٹھاتے جبکہ برہان وانی کی شہادت پر کشمیر میں آج جو ہوا اس کی مذمت کرتے ہیں۔
انہوں نے مزید کہا کہ آزاد کشمیر میں الیکشن مہم کیلئے عمران خان جلد جائیں گے، میں بھی الیکشن مہم میں حصہ لوں گا اور وزیراعظم کے ساتھ وہاں جاؤں گا اور انشااللہ تحریک انصاف آزاد کشمیر میں حکومت بنائے گی۔
انہوں نے کہا کہ کالعدم ٹی ایل پی کے حوالے سے وزیرداخلہ نے بتایا کہ ٹی ایل پی کی فائل کابینہ میں بھیج رہے ہیں وہ فیصلہ کرے گی۔
