شکارپور، لاڑکانہ (نمائندگان جسارت) شکارپور میں خودکشی کے 2 مختلف واقعات، دو نوجوان جاں بحق۔ ٹاؤن مدیجی کے قریب گاؤں ھکڑا میں نوجوان شھنیل ھکڑو نے زہریلی دوا پی کر خودکشی کرلی، پولیس نے لاش تحویل میں لے کر مدیجی اسپتال منتقل کردیا، ابتدائی تفتیش کے مطابق متوفی شھنیل ھکڑو گھریلو پریشانیوں کا شکار تھا، دل برداشتہ ہوکر زہریلی دوا پی کر اپنی زندگی کا خاتمہ کرلیا۔ دوسرے واقعے میں گھریلو ناچاقی پر نوجوان رحیم بخش ڈاھانی نے پستول سے فائر کرکے زندگی کا خاتمہ کرلیا۔ پولیس نے لاش ضروری کارروائی کے لیے اسپتال منتقل کی۔ پولیس کے مطابق واقعے کی مزید تفتیش جاری ہے۔ ایس ایس پی لاڑکانہ عمران قریشی کی ہدایات پر لاڑکانہ پولیس نے جرائم پیشہ افراد کیخلاف کارروائیاں کرتے ہوئے قتل، ڈکیتی، لوٹ مار، چوریوں، پولیس مقابلوں اور ناجائز اسلحہ رکھنے کے مقدمات میں روپوش و مطلوب 6 ملزمان کو گرفتار کرکے اسلحہ، منشیات اور سامان برآمد کرکے مقدمات درج کرلیے ہیں۔ باڈہ پولیس نے ڈیرا لنک روڈ سے ایئر پورٹ، یونیورسٹی، ڈوکری اور فتح پور تھانوں پر ڈکیتیوں، لوٹ مار، چوریوں، پولیس مقابلوں اور ناجائز اسلحہ کے 20 سے زائد سنگین نوعیت کے مقدمات میں ملوث مدد عرف مدو کھوکھر کو تین کلو چرس سمیت، رشید وگن پولیس نے اپنی بیوی نور جہان کھکھرانی کے قتل مقدمے میں مطلوب ملزم وسیم کھکھرانی کو پستول اور گولیوں سمیت، اللہ آباد اور علی گوہر آباد پولیس نے عیسائی قبرستان اور پھل روڈ سے اسٹریٹ کرائم، موبائل سنیچنگ، پولیس مقابلوں اور منشیات کے مقدمات میں روپوش و مطلوب ملزمان نیاز ابڑو، گل زمان ابڑو، آفتاب سولنگی اور سجاد کھوکھر کو گرفتار کرلیا۔ پولیس کے مطابق گرفتار ملزمان کیخلاف مقدمات درج کرکے تفتیش شروع کردی گئی ہے۔ دوسری جانب ایس ایس پی لاڑکانہ عمران قریشی نے پولیس ٹیم کے لیے شاباش دی۔
