پاکستان نے دہشتگردی کے عفریت کو کچلنے کیلئے ایک طویل جنگ لڑی، شاہ محمود قریشی

ویب ڈیسک -
343
” یوکرین سمیت تمام تنازعات کو بین الاقوامی قوانین کی روشنی میں حل کریں گے

بغداد: وزیر خارجہ مخدوم شاہ محمود قریشی نے کہا ہے کہ عراق کی طرح پاکستان نے بھی دہشت گردی کے عفریت کو کچلنے کیلئے ایک طویل جنگ لڑی ہے، دہشتگردی کے خلاف جنگ میں پاکستان کو کثیر مالی و جانی نقصان سے گزرنا پڑا ہے جبکہ دہشتگردی سے موثر انداز میں نمٹنے کیلئے دونوں ممالک ایک دوسرے کے تجربات سے استفادہ حاصل کر سکتے ہیں۔

Image

تفصیلات کے مطابق  وزیر خارجہ مخدوم شاہ محمود قریشی نے وزارتِ داخلہ عراق کا دورہ کیا جہاں عراق کے وزیر داخلہ عثمان الغانمی نے وزیر خارجہ کا خیر مقدم کیا، وزیر خارجہ نے عراقی وزیر داخلہ کے ساتھ ملاقات کی۔

وزیر خارجہ کا کہناتھا کہ پاکستان، عراق کے ساتھ دو طرفہ تعلقات کو خصوصی اہمیت دیتا ہے،  پاکستان اور عراق کے مابین یکساں مذہبی، ثقافتی اور تاریخی بنیادوں پر استوار، دیرینہ برادرانہ تعلقات ہیں جبکہ پاکستانی، مذہبی اعتبار سے عراق کے ساتھ گہری دلی وابستگی رکھتے ہیں۔

وزیر خارجہ نے مزید کہا کہ ہر سال دولاکھ سے زائد ہر مسلک سے تعلق رکھنے والے پاکستانی زیارات مقدسہ کیلئے عراق آتے ہیں، وزیر اعظم عمران خان کے وژن کے مطابق، زائرین کی سفری مشکلات کے ازالے اور انہیں مناسب سہولیات کی فراہمی کیلئے، زائرین مینجمنٹ پالیسی متعارف کروا رہے ہیں۔

انہوں نے کہا کہ زائرین مینجمنٹ پالیسی پر موثر عملدرآمد کیلئے، ہمیں عراقی حکومت کی معاونت درکار ہوگی، جس پر وزیرخارجہ نے، پاکستانی زائرین کیلئے ویزوں کے حصول میں آسانی پیدا کرنے کی جانب توجہ مبذول کرائی۔

 انہوں نے کہا کہ عراق کی طرح پاکستان نے بھی دہشت گردی کے عفریت کو کچلنے کیلئے ایک طویل جنگ لڑی ہے، دہشتگردی کے خلاف جنگ میں پاکستان کو کثیر مالی و جانی نقصان سے گزرنا پڑا ہے جبکہ دہشتگردی سے موثر انداز میں نمٹنے کیلئے دونوں ممالک ایک دوسرے کے تجربات سے استفادہ حاصل کر سکتے ہیں۔

 دوسری جانب عراقی وزیر داخلہ عثمان الغانمی نے وزیر خارجہ کو وزارت داخلہ عراق آمد پر خوش آمدید کہتے ہوئے کہا کہ کورونا وبا کے دوران،عراقی بھائیوں کیلئے پاکستان کی جانب سے کی گئی معاونت پر پاکستانی قیادت و عوام کا شکریہ ادا کرتے ہیں جبکہ عراقی وزیر داخلہ نے وزیر خارجہ مخدوم شاہ محمود قریشی کو دو باہمی دلچسپی کے امور پر ہر ممکن تعاون کی یقین دہانی کرائی ہے۔

مزید خبریں