ملتان سلطانز کو جھٹکا، بوم بوم آفریدی پی ایس ایل سے باہر ، آصف آفریدی ان

کراچی (اسٹاف رپورٹر)شاہد آفریدی کمر کی انجری کے باعث پی ایس ایل 6 سے باہر،عمر امین اور برینڈن کنگ اسلام آباد یونائیٹڈ جبکہ حضرات اللہ زازائی، ثمین گل اور خالد عثمان بحثیت ریزرو کرکٹرز پشاور زلمی میں شامل ہو گئے۔ پاکستان کرکٹ بورڈ سے پیر کوجاری کردہ اعلامیہ کے مطابق ملتان سلطانز کے اسٹار آل رائونڈر شاہد آفریدی کمر کی انجری کے باعث پاکستان سپر لیگ 6 سے باہر ہوگئے ۔ وہ ابوظہبی میں کھیلے جانے والے لیگ کے بقیہ میچز میں ملتان سلطانز کی نمائندگی نہیں کرپائیں گے۔قومی کرکٹ ٹیم کے سابق کپتان شاہد آفریدی پی ایس ایل 6 کے بقیہ میچز کی غرض سے کراچی میں ٹریننگ کررہے تھے جہاں انہوں نے اپنی کمر کے نچلے حصے میں درد محسوس کیا۔ڈاکٹرز نے ان کی انجری کا جائزہ لینے کے بعد انہیں کچھ ہفتوں کے لیے آرام کا مشورہ دیا ہے۔شاہد آفریدی نے پاکستان سپر لیگ 6 کے 4 میچز میں ملتان سلطانز کی نمائندگی کی تھی،ان کی جگہ آصف آفریدی کو ملتان سلطانز کے اسکواڈ میں شامل کرلیا گیا ہے۔ آل رائونڈر شاہد آفریدی نے کہاہے کہ انہوں نے پاکستان سپر لیگ 6 کے بقیہ میچز کے لیے ٹریننگ کے دوران کمر کے نچلے حصے میں درد اٹھنے پر ڈاکٹر سے رجوع کیا، بدقسمتی سے انہیں آرام کا مشورہ دیا گیا ہے،جس کی وجہ سے وہ ابوظہبی لیگ میں ملتان سلطانز کو جوائن نہیں کرسکیں گے۔شاہد آفریدی نے کہا کہ انہیں مایوسی ہے کہ وہ ٹورنامنٹ میں شرکت نہیں کررہے تاہم ان کی تمام تر نیک تمنائیں ملتان سلطانز کے ساتھ ہیں۔ دوسری طرف عمر امین اور برینڈن کنگ اسلام آباد یونائیٹڈ کا حصہ بن گئے ، جس کے بعد اسلام آباد یونائیٹڈ کا 20 رکنی اسکواڈ مکمل ہوگیا۔ پشاور زلمی نے افغانستان کے حضرات اللہ زازائی، ثمین گل اور خالد عثمان کو بحثیت ریزرو کرکٹرز اپنے اسکواڈ میں شامل کرلیا ہے۔