کراچی (اسٹاف رپورٹر) دریائے سندھ میں نہریں نکالنے کے خلاف جسقم کی جانب سے نکالی گئی ریلی کو پولیس نے شارع فیصل ایف ٹی سی بلڈنگ کے قریب ریڈ زون ایریا میں داخل ہونے سے روک دیا جس پر ریلی کے شرکا مشتعل ہوگئے، مشتعل شرکا اور پولیس کے درمیان ہاتھا پائی شروع ہوگئی، اس دوران شارع فیصل پر بدترین ٹریفک جام ہوگیا اور گاڑیوں کی لمبی لمبی قطاریں لگ گئیں، ریلی کے شرکا کا کہنا تھا کہ وہ پولیس کے بتائے گئے متبادل راستے سے نہیں جائیں گے جبکہ پولیس کا کہنا تھا کہ ریلی کو ریڈ زون میں داخل نہیں ہونے دیا جائے گا، گورا قبرستان کے مقام پر رکاوٹیں لگادی گئیں۔ مشتعل کارکنان نے ایس ایس پی ساؤتھ مہروز علی سے ہاتھا پائی شروع کردی اور ڈنڈے بھی چلائے، پولیس اہلکار ایس ایس پی ساؤتھ کو مشتعل کارکنان سے بچا کر محفوظ مقام پر لے گئے جبکہ ایس ایچ او صدر اور ایس ایس پی ساؤتھ کا گن مین شفیق زخمی ہوگیا، پولیس کے مطابق ریلی کو ہم نے روکنے کی کوشش نہیں کی تھی صرف اتنا کہا تھا کہ ریڈ زون میں جانا قانون کی خلاف ورزی ہے جس پر مظاہرین نے پولیس سے ہاتھا پائی اور ڈنڈے برسانے شروع کردیے مظاہرین نے پولیس کی 3 موبائلیں بھی ڈنڈے مار کر توڑ دیں، واقعے کے بعد پولیس اور رینجرز کی بھاری نفری موقع پر پہنچ گئی اور مظاہرین کو متبادل راستے سے کراچی پریس کلب کی جانب روانہ کیا گیا اور حالات کو کنٹرول کیا گیا۔
