پاکستان کا سب سے جھوٹا شخص عمران خان ہے، پرویز خٹک

نوشہرہ (صباح نیوز)سابق وزیر اعلیٰ خیبر پختونخوا پرویز خٹک نے کہا ہے کہ پاکستان کا سب سے جھوٹا شخص عمران خانہے، ہم سے کوئی غلطی نہیں ہوئی، غلطی اس قوم سے ہوئی ہے، میری کوئی پارٹی نہیں، میری پارٹی اس ملک کے عوام ہیں۔سارے حقائق اپنی کتاب میںعوام کے سامنے لائوں گا،مانکی شریف نوشہرہ میں جلسہ سے خطاب کرتے ہوئے کہاکہ سیاست کوئی مذاق نہیں کہ ہر کوئی عوام کی خواہشات کے مطابق خدمت کرے۔ مجھے بہت خوشی ہورہے کہ صوبے کے
عوام گزشتہ انتخابات میں غلط اور نااہل لوگوں کو ووٹ دے کر اب رو رہے ہیں۔ پرویز خٹک نے سوال کرتے ہوئے کہا کہ پی ٹی آئی کے ایک سالہ دور حکومت میں کون سے کام ہوئے ہوئے ہیں؟انہوں نے کہا کہ عوام بہت تکلیف میں ہیں، نوجوانوں کو روزگار کی ضرورت ہے، مجھے پورے ملک میں عزت دی جاتی ہے، میں وہ شخصیت ہوں، جس کے ساتھ قوم کھڑی ہے۔سابق وزیر اعلیٰ نے کہا کہ میں بہت جلد ایک کتاب لکھنے جا رہا ہوں، کتاب میں اس ملک کے ساتھ جو کچھ ہو رہا ہے وہ سب لکھوں گا، سارے حقائق عوام کے سامنے لائوں گا۔پرویز خٹک کا کہنا تھا کہ میں نے ضلع نوشہرہ میں ترقیاتی کاموں کا جال بھچایا، زرعی زمینوں کیلے ٹیوب ویل کے جال بچھائے، گاوں گاوں اسپتال، مساجد، اسکولز اور سڑکیں بنائیں۔سابق وزیر اعلیٰ نے عمران خان کو سخت تنقید کا نشانہ بناتے ہوئے کہا کہ پاکستان کا سب سے بڑا جھوٹا عمران خان ہے، جس نے جھوٹے وعدوں کے ذریعے عوام سے ووٹ حاصل کیے۔ انہوں نے کہا کہ گزشتہ انتخابات میں کامیاب ہونے والے ارکان جلد ہی عوام کے دبائوکی وجہ سے بھاگنے پر مجبور ہو جائیں گے۔ پرویز خٹک نے جلسے کے شرکا کو یقین دہانی کرائی کہ وہ عوام کی خدمت کے لیے ہمیشہ حاضر ہیں اور ان کے حقوق کے لیے ہر ممکن جدوجہد جاری رکھیں گے۔علاوہ ازیں سابق وزیرِ اعلیٰ خیبر پختونخوا پرویز خٹک نے جے یو آئی ف میں شمولیت کے حوالے سے چلنے والی خبروں کی تردید کر دی۔پرویز خٹک نے کہاکہ میں نے ابھی تک کسی جماعت میں شمولیت کا فیصلہ نہیں کیا، تاہم چھوٹے بھائی سے اختلافات ختم کر رہا ہوں، میں نے مولانا کو اعتماد میں لے لیا ہے۔انہوں نے کہا کہ گزشتہ دنوں مولانا فضل الرحمن سے صرف معمول کی ملاقات ہوئی تھی، میں فی الحال آزاد حیثیت سے جلسہ کر رہا ہوں۔