کراچی(کامرس رپورٹر)بینک آف خیبر نے باضابطہ طور پر مکمل اسلامی بینک میں منتقلی کا عمل شروع کردیا ہے۔ بینک نے جمعرات کو پاکستان اسٹاک ایکسچینج (پی ایس ایکس) کو دیے گئے نوٹس میں اس پیش رفت کا اعلان کیا۔بی او کے نے کہا کہ بینک نے روایتی سے اسلامی بینک میں تبدیل کرنے کا عمل شروع کردیا ہے۔یہ پیش رفت ایسے وقت میں سامنے آئی ہے جب پاکستان میں اسلامی بینکنگ گزشتہ دو دہائیوں کے دوران نمایاں ترقی کرچکی ہے، جس کی وجہ مضبوط طلب، ریگولیٹری معاونت اور شریعت کے مطابق مالیاتی حل ہیں۔ یہ صنعت تیزی سے پھیلی ہے، جہاں مکمل اسلامی بینکوں کے ساتھ ساتھ روایتی بینک بھی اسلامی بینکنگ ونڈوز کے ذریعے بڑھتی ہوئی صارفین کی تعداد کو خدمات فراہم کررہے ہیں۔اسٹیٹ بینک آف پاکستان کے تازہ ترین اعداد و شمار کے مطابق اسلامی بینکنگ انڈسٹری کے اثاثے جون 2024 کے اختتام پر ریکارڈ شدہ سطح سے 192 ارب روپے بڑھ کر ستمبر 2024 کے اختتام تک 9,881 ارب روپے تک پہنچ گئے۔ اسی طرح ڈپازٹس میں بھی اضافہ جاری رہا اور 233 ارب روپے اضافے کے ساتھ 7 ہزار 596 ارب روپے تک پہنچ گئے۔صنعت کے اثاثوں اور ڈپازٹس میں سالانہ اضافہ بالترتیب 17.4 فیصد اور 23.3 فیصد ریکارڈ کیا گیا۔
