PTA‘ FIA کے چھاپے ، ہزاروں غیرقانونی سمیں برآمد، 11 گرفتار

اسلام آباد (صباح نیوز) پاکستان ٹیلی کمیونیکیشن اتھارٹی(پی ٹی اے) نے فیڈرل انویسٹی گیشن ایجنسی (ایف آئی اے) سائبر کرائم ونگ کے ساتھ مل کر ملتان، لاہور، فیصل آباد، گوجرانوالہ، راولپنڈی اور کراچی میں کامیاب چھاپے مارے، جن میں ہزاروں کی تعداد میں غیر قانونی، پری ایکٹیویٹڈ بین الاقوامی سمیں قبضے میں لے لی گئیں۔ ملتان میں 5
چھاپوں کے دوران 7064 سمیں برآمد ہوئیں اور 8 افراد گرفتار کرلیے گئے۔ لاہور اور گوجرانوالہ میں مجموعی طور پر 252 سمیں قبضے میں لے لی گئیں، جبکہ دونوں دکاندار موقع پر ہی گرفتار کرلیے گئے۔ راولپنڈی میں متعدد غیر قانونی سمیں برآمد ہوئیں، جن میں حالیہ کارروائیوں کے دوران 335 یوفون کی سمز بھی شامل ہیں۔ کراچی میں 10 سمز برآمد ہوئیں اور دکاندار کو بھی گرفتار کرلیا گیا۔ پی ٹی اے غیر قانونی سموں کی روک تھام کیلیے پرعزم ہے اور اس حوالے سے عوام سے اپیل ہے کہ اس طرح کی غیر قانونی سرگرمیوں کی شکایات پی ٹی اے کی ویب سائٹ www.pta.gov.pk کے ذریعے درج کروا کر محفوظ ڈیجیٹل ماحول کے قیام میں اپنا کردار ادا کریں۔