لاہو ر(نمائندہ جسارت)امیر جماعت اسلامی حافظ نعیم الرحمن نے کہا ہے کہ مہنگی بجلی اور آئی پی پیز مافیا کے خلاف تحریک کو منطقی انجام تک پہنچائیں گے، حکومت عوام کو ریلیف دے، مہنگائی میں کمی حکومتی دعوے جھوٹ پر مبنی ہیں، وزیراعظم اور ان کی بھتیجی اشتہاروں کے ذریعے مہنگائی کم کرنے میں مصروف ہیں، تاثر دیا جا رہا ہے کہ پنجاب میں بہت کام ہو رہا ہے، کسان کارڈ دراصل قرضہ کارڈ ہے۔ رمضان کی آمد سے قبل اشیا خورونوش کی قیمتوںمیں مزید اضافہ ہو گیا، موجودہ حکمران فارم 47 کی پیداوار ہیں۔ پاکستان کے حکمران امریکا کی طرف دیکھتے ہیں، حالات بتا رہے کہ امریکا دنیا میں تنہا رہ جائے گا اور اس سے توقعات وابستہ رکھنے والے بھی ساتھ ہی ڈوبیں گے۔ ملک میں غریب کے لیے تعلیم اور روزگار کے دروازے بند ہیں، مڈل کلاس طبقہ اپنی بقا کی جنگ لڑ رہا ہے۔ مستقبل جماعت اسلامی کا ہے، ہم حق کو بیان اور مسلسل جدوجہد کرتے رہیں گے، عوام کے حقوق کے لیے منظم طریقے سے آگے بڑھنے کی ضرورت ہے۔ ان خیالات کا اظہار انھوں نے منصورہ میں مرکزی تربیت گاہ کے شرکا سے خطاب کرتے ہوئے کیا۔ امیر جماعت نے کہا کہ سرمایہ داروں نے پوری دنیا میں جمہوریتوں کو یرغمال بنایا ہوا ہے۔ جس طرح پاکستان میں جمہوریت کو کنٹرول کیا جاتا ہے، یہی کام مغرب میں بھی خاص طریقے سے ہوتا ہے، اسرائیل میں جنگ مخالف لوگوں کو اقتدار سے دور رکھنے کے لیے واشنگٹن نے پیسہ لگایا، امریکا دنیا میں تباہی چاہتا ہے، امریکی دہشت گردی کی سالوں پر مشتمل ایک تاریخ ہے، اب اسے دنیا میں مزاحمت کا سامنا کرنا پڑ رہا ہے، افغانستان کے بعد غزہ میں اسرائیل کی شکست دراصل امریکا کی ہی شکست ہے، پورا لاطینی امریکا بھی واشنگٹن کی زیادتیوں اور ظلم کے خلاف اکٹھا ہو رہا ہے، امریکا اور اس کے حواریوں کو پوری دنیا میں ہزیمت اٹھانا پڑے گی، دنیا بھر میں اس نظام کے متلاشی لوگ موجود ہیں جو عدل و انصاف کی بنیاد پر قائم ہو اور یہ نظام صرف اور صرف اسلامی نظام ہے۔ جماعت اسلامی کی جدوجہد اقامت دین کی جدوجہد ہے۔حافظ نعیم الرحمن نے کہا کہ حکومت مافیاز کو نواز رہی ہے، آئی پی پیز سے معاہدوں کے نتیجے میں ایک ہزار ارب کا فائدہ ہوا، یہ رقم عوام کو ریلیف دینے کے لیے استعمال کیوں نہیں ہو رہی ہے، ارکان پارلیمنٹ اپنی تنخواہوں میں اضافہ کر رہے ہیں اور دوسری طرف عوام کا خون نچوڑا جا رہا ہے، تنخواہ داروں پر ٹیکسوں کا پہاڑ لاد دیا گیا۔ انھوں نے کہا کہ جماعت اسلامی نے لاہور میں ’’بنوقابل‘‘ کے دوسرے فیز کا آغاز کر دیا ہے، لاکھوں بچوں کو مفت آئی ٹی ٹریننگ دی جائے گی، جماعت اسلامی یکساں نظام اور یکساں نصاب کی بات کرتی ہے۔ حکومتوں کی ذمے داری ہے کہ عوام کے لیے معیاری اور مفت تعلیم کا بندوبست کریں، حکومت عوام کو سہولت دیتی ہے تو یہ احسان نہیں ان کا حق ہے، جماعت اسلامی نے فیصلہ کیا کہ عوام اور خصوصی طور پر نوجوانوں میں ان کے حقوق سے متعلق آگاہی پیدا کرنی ہے، اس کے لیے ملک کے طول و عرض میں جدوجہد جاری ہے، اس جدوجہد کے ساتھ ہمارا یہ بھی فیصلہ ہے کہ اپنے تئیں بہتری کے لیے کوششیں بھی کریں گے، انہی کوششوں میں سے ایک بنو قابل پروگرام ہے۔
