کراچی(کامرس رپورٹر) پاکستان پیٹرولیم لمیٹڈ (پی پی ایل) اور حکومت بلوچستان (جی او بی) نے سوئی ڈویلپمنٹ اینڈ پروڈکشن لیز (ڈی اینڈ پی ایل) کے لئے پٹرولیم رعایتی معاہدے (پی سی اے) پر عمل درآمد کی جانب ایک اہم قدم ، مفاہمت کی یادداشت (ایم او اے) پر دستخط کرکے ایک سنگ میل عبور کرلیا ہے۔معاہدے پر دستخط کی تقریب ضلع ڈیرہ بگٹی ,سوئی میں منعقد ہوئی جس میں وزیر اعلیٰ بلوچستان میر سرفراز بگٹی مہمان خصوصی تھے جبکہ وفاقی وزیر برائے منصوبہ بندی، ترقی و خصوصی اقدامات احسن اقبال ، سینیٹر شاہ زیب درانی،سینیٹردنیش کمار، سینئر سرکاری حکام، معززین اور اہم شراکت داروں نے شرکت کی۔پی پی ایل کے منیجنگ ڈائریکٹر اور چیف ایگزیکٹو ا?فیسرعمران عباسی اور سیکریٹری انرجی ڈپارٹمنٹ حکومت ِبلوچستان جنا ب محمد داود بزئی نے اپنے اپنے اداروں کی جانب سے معاہدے پر باضابطہ دستخط کیے۔اس تاریخی معاہدے کے تحت پی پی ایل حکومت بلوچستان کو لیز میں توسیع کا بونس، پروڈکشن بونس اور سماجی بہبود کی ذمہ داریوں کی صورت میں تقریبا 60 ارب روپے فراہم کرے گا۔ اس ضمن میں ایک اہم قدم کے طور پر پی پی ایل نے وزیراعلیٰ بلوچستان کو 36 ارب روپے کی پہلی قسط پیش کی جبکہ بقیہ رقم مارچ اور مئی 2025 میں دی جائے گی۔کاروباری سماجی ذمہ داری کے عہد پر کاربند کمپنی کی حیثیت سے پی پی ایل نے گزشتہ دہائی کے دوران بلوچستان میں تقریبا 13.76 ارب روپے خرچ کئے ہیں، جس میں صرف 2024- 2023 میں اس کے لئے 2.72 ارب روپے مختص کیے گئے تھے۔ یہ تعاون تعلیم، صحت کی دیکھ بھال، بنیادی ڈھانچے، مفت گیس اور پانی کی فراہمی اور پسماندہ آبادیوں کی ترقی کے اقدامات جیسے اہم شعبوں میں خدمات کے لئے کیا گیا ہے۔سوئی کے عوام کی بنیادی ضروریات کو مد نظر رکھتے ہوئے پی پی ایل گزشتہ دس سالوں کے دوران 7.4 ارب روپے کی گیس اور 1.7 ارب روپے کا پانی مفت فراہم کر رہی ہے۔ اس وقت پی پی ایل سوئی کے رہائشیوں کو روزانہ 4 ایم ایم سی ایف گیس اور 2 ملین گیلن سے زائد پانی فراہم کرتی ہے جس سے مقامی آبادی کے معیار زندگی میں بہتری کو یقینی بنایا جا رہا ہے۔
