بھارت کی ریاست تلنگانہ کے وزیرِاعلیٰ ریوانتھ ریڈی نے الزام لگایا ہے کہ وزیرِاعظم نریندر مودی پس ماندہ طبقے میں پیدا نہیں ہوئے تھے بلکہ انہوں نے قانونی فریم ورک استعمال کرتے ہوئے اپنا طبقہ تبدیل کیا ہے۔ اس الزام پر حکمراں بھارتیہ جنتا پارٹی نے شدید ردِعمل ظاہر کیا ہے۔
بی جے پی کا کہنا ہے کہ تلنگانہ کے وزیرِاعلیٰ نے جو کچھ کہا ہے وہ کسی ریاست کے وزیرِاعلیٰ کے منصب پر فائز شخص کو زیب نہیں دیتا۔ ریوانتھ ریڈی کا دعوٰی ہے کہ نریندر مودی خود کو پس ماندہ طبقے کا ظاہر کرکے لوگوں کو دھوکا دیتے رہے ہیں اور یہ دھوکا اُنہوں نے زیادہ سے زیادہ ووٹ بٹورنے کے لیے دیا ہے۔ حقیقت یہ ہے کہ وہ ایک اعلیٰ ذات میں پیدا ہوئے اور قانونی طریقِ کار اپناکر خود کو پس ماندہ طبقے میں شمار کروایا ہے۔
ریوانتھ ریڈی کہتے ہیں کہ پیدائش سے متعلق ریکارڈ کی بنیاد پر نریندر مودی اعلیٰ ذات میں پیدا ہوئے تھے اور گجرات کا وزیرِاعلیٰ منتخب ہونے کے بعد انہوں نے اپنی ذات تبدیل کرکے خود کو پس ماندہ طبقے میں شمار کروانا شروع کردیا۔ یہ بد دیانتی ہے کیونکہ اس کے ذریعے لوگوں کو دھوکا دیا گیا ہے۔
بھارتیہ جنتا پارٹی کا کہنا ہے کہ تلنگانہ کے وزیرِاعلیٰ نے جو کچھ کہا ہے ہو ہتک آمیز ہے۔ لوگوں کو دھوکا دینے کا الزام یکسر بے بنیاد ہے۔ کسی ریاست کے وزیرِاعلیٰ کو اس نوعیت کی بات کہنے سے گریز کرنا چاہیے۔
