حکومت نے سرکاری ملازمین کی تنخواہ ،پنشن اور دیگر مالی معاملات کا جائزہ لینے کی ہدایت کردی

اسلام آباد (مانیٹرنگ ڈیسک) حکومت نے سرکاری ملازمین کی تنخواہوں میں تفریق، پنشن اور دیگر مالی معاملات کا جائزہ لینے کے لیے فنانس ڈویژن کو ہدایات جاری کر دیں۔ وزارت بین الصوبائی رابطہ کی جانب سے بیان کے مطابق وفاقی سرکاری ملازمین کے مسائل کے حل کے لیے وزیر اعظم کے مشیر رانا ثناء اللہ کی سربراہی میں قائم کی گئی کمیٹی کا اہم اجلاس ہوا، اجلاس میں وزیر مملکت برائے خزانہ علی پرویز اور طارق فضل چودھری اور سرکاری ملازمین گرینڈ الائنس کے عہدیداران نے بھی شرکت کی۔ بیان کے
مطابق آل گورنمنٹ ایمپلائز گرینڈ الائنس کے عہدیداران نے تنخواہوں میں تفریق، پے اینڈ پنشن کمیشن کی سفارشات پر عمل درآمد سمیت دیگر مطالبات کمیٹی کو پیش کیے، صوبوں کی طرز پر ملازمین کی اپ گریڈیشن، لیو انکیشمنٹ، دوران سروس وفات پر وزیراعظم پیکج میں کی گئی تبدیلی کو واپس لینا بھی مطالبات میں شامل ہے۔ رانا ثناء اللہ نے کہا کہ وزیراعظم کی خصوصی ہدایت پر ملازمین کے مسائل کا جائزہ لینے اور ان کے حل کے لیے یہ کمیٹی تشکیل دی گئی ہے، وزیراعظم نے سرکاری ملازمین کے مسائل کو ترجیحی بنیادوں پر حل کرنے کی ہدایت کی ہے۔ مسائل کے حل کے لیے قابل عمل تجاویز پر فوری عمل درآمد کیا جائے گا۔ اعلامیے کے مطابق رانا ثنااللہ نے تنخواہوں میں تفریق، پنشن اور دیگر مالی معاملات کا جائزہ لینے کے لیے فنانس ڈویژن کو ہدایات جاری کر دی۔