چیئرمین پاکستان کرکٹ بورڈ (پی سی بی) محسن نقوی نے کہا ہے کہ محمد رضوان کی قیادت میں ہم چیمپئنز ٹرافی جیتیں گے۔
قذاقی اسٹیڈیم لاہور کے تعمیراتی کام میں حصہ لینے والے مزدوروں کے اعزاز میں دیے گئے ظہرانے سے خطاب کرتے ہوئے چیئرمین پاکستان کرکٹ بورڈ محسن نقوی نے کہا کہ قذافی اسٹیڈیم کا شمار دنیا کے بہترین اور خوبصورت اسٹیڈیمز میں ہوگا، قوم سے کیا وعدہ پورا ہونے پر اللہ تعالیٰ کا شکر گزار ہوں۔
چیئرمین پی سی بی کا کہنا ہے کہ آج کا پاکستان کے لیے بہت خوشی اور فخر کا دن ہے، وزیرِ اعظم شہباز شریف سے کہوں گا کہ ان ورکرز کے لیے ایوارڈز کا اعلان کریں، ورکرز کی محنت کے بغیر یہ سب ممکن نہیں تھا۔
انہوں نے کہا کہ شائقین اور کھلاڑی اسٹیڈیم میں فراہم کردہ جدید سہولیات سے محظوظ ہوں گے۔
ان کا کہنا تھا کہ ایونٹ کو نئے قذافی اسٹیڈیم کے شایان شان ہونا چاہئے ،دعا ہے کہ 3 ملکی سیریز میں پاکستان کامیاب ہو۔
