کراچی:پاکستان کے زرمبادلہ کے ذخائر میں بہتری کا سلسلہ جاری ہے اور 31 جنوری 2025 کو یہ ذخائر 16 ارب 4 کروڑ 41 لاکھ ڈالر کی سطح پر پہنچ گئے۔
اسٹیٹ بینک آف پاکستان کی جانب سے جاری کردہ رپورٹ کے مطابق حالیہ ہفتے میں زرمبادلہ کے ذخائر میں نمایاں اضافہ ریکارڈ کیا گیا ہے جس کے مطابق مرکزی بینک کے پاس اس وقت 11 ارب 41 کروڑ 83 لاکھ ڈالر موجود ہیں جب کہ کمرشل بینکوں کے پاس 4 ارب 62 کروڑ 58 لاکھ ڈالر کے ذخائر محفوظ ہیں۔
گزشتہ ہفتے کے دوران اسٹیٹ بینک کے ذخائر میں 4 کروڑ 60 لاکھ ڈالر کا اضافہ ہوا، جس سے ملک کے مالی استحکام میں مزید بہتری آنے کی توقع ہے۔ ماہرین کے مطابق زرمبادلہ کے ذخائر میں یہ اضافہ مثبت معاشی اشاریوں کا عکاس ہے اور اس سے ملکی معیشت کو مزید تقویت ملے گی۔
معاشی تجزیہ کاروں کا کہنا ہے کہ زرمبادلہ کے ذخائر میں اضافہ ملک کی معیشت کے لیے ایک مثبت اشارہ ہے کیونکہ یہ نہ صرف بیرونی ادائیگیوں کو یقینی بنانے میں مدد دے گا بلکہ پاکستانی روپے کی قدر کو بھی مستحکم رکھنے میں معاون ثابت ہوگا۔
معاشی ماہرین کو امید ہے کہ اگر برآمدات میں اضافہ، ترسیلات زر کی مستحکم آمد اور سرمایہ کاری میں بہتری جاری رہی تو زرمبادلہ کے ذخائر میں مزید استحکام آئے گا، جس سے ملکی معیشت کو درپیش مالی مشکلات میں کمی آئے گی۔
