رہنما پی ٹی آئی شاہ محمود قریشی کا کہنا تھا کہ پاکستان مسلم لیگ (ن) اور پیپلز پارٹی نے مل کر جمہوریت کو نقصان پہنچایا۔
اڈیالہ جیل میں صحافیوں سے بات چیت کرتے ہوئے پاکستان تحریک انصاف (پی ٹی آئی) کے رہنما شاہ محمود قریشی نے کہا ہے کہ ملک میں اصلاحات کے لیے قومی اتفاق رائے کی ضرورت ہے، ن لیگ اور پیپلز پارٹی نے پیکا ایکٹ میں ترمیم کر کے ملک میں آزادی اظہار رائے کا گلا گھونٹا ہے۔
ان کا کہنا تھا کہ پہلے لوگوں نے اس ملک کو ٹوٹتے دیکھا اب ملک ڈوب رہا ہے، ہمیں رہائی اپنے موقف اور مقدمات کی پیروی سے مل سکتی ہے،کوئی انفرادی شخص چیلنجز سے نمٹنے کی صلاحیت نہیں رکھتا۔
انہوں نے کہا کہ نفرت مٹانے اور خلیج کم کرنے کی ضرورت ہے ،تمام جماعتیں آزادانہ اور خود مختار الیکشن کمیشن پر اتفاق کریں،خود مختار عدلیہ اور میڈیا سے کسی کو کوئی نقصان نہیں ہوگا۔
شاہ محمود قریشی نے مزید کہا کہ لوگوں کو بلاوجہ ٹرمپ سے توقعات نہیں باندھنی چاہئیں، موجودہ قیادت دل اور دماغ سے ملک کا سوچے۔
