اسلامی دنیا مسئلہ کشمیر پر ہمارے ساتھ ہے‘ جام کمال

جدہ (سید مسرت خلیل) وفاقی وزیر تجارت جام کمال خان نے کہا ہے کہ مجھے خوشی ہے کہ سعودی عرب میں پاکستانی مسئلہ کشمیر کو شدت سے یاد رکھتے ہیں، بھارت دنیا بھر میں کہتا ہے کشمیر کوئی مسئلہ نہیں جبکہ ہمارا کام ہے کہ ہم اس مسئلے کو زندہ رکھیں۔ وہ قونصلیٹ جنرل پاکستان جدہ میں مقبوضہ کشمیر میں گزشتہ پون صدی سے زاید عرصے سے جاری بھارتی جبر و تسلط کے خلاف کشمیری عوام سے اظہار یکجہتی کے لیے منعقدہ تقریب سے بطور مہمان خصوصی خطاب کررہے تھے۔انھوں نے کہاکہ سعودی عرب سمیت اسلامی دنیا اوراو آئی سی مسئلہ کشمیر پر ہمارے ساتھ
ہے۔ ہمیں کامیابی ضرورہوگی وہ ادارے جو اس وقت بھارت کے مظالم پرخاموش ہیں انہیں ایک دن حقیقت سے آشنائی ہوگی اور مسئلہ کشمیر وہاں کے عوام کی خواہشات کے مطابق حل ہوگا۔ یکجہتی کشمیرکی تقریب سے آزاد کشمیر کے وزیر بجلیات جاوید اقبال بڈھانوی، سفیر پاکستان احمد فاروق، او آئی سی میں پاکستان کے مستقل نمائندے سید محمد فواد شیر، کشمیر کمیٹی جدہ کے صدر مسعوداحمد پوری، جموں و کشمیر اوورسیزکمیونٹی کے صدر احسان مغل نے بھی خطاب کیا۔ قبل ازیں قونصل جنرل پاکستان جدہ خالد مجید نے تمام مہمانوں کا خیرمقدم کیا اور تقریب میں شرکت پر شکریہ ادا کیا۔ بیرون ملک قائم پاکستانی مشنز کی جانب سے یوم یکجہتی کشمیر کی مناسبت سے خصوصی ریلیوں، جلسوں، سیمینارز اور تصویری نمائشوں کا اہتمام کیا گیا۔ ہر سال مقبوضہ وادی میں یوم یکجہتی کشمیر کے موقع پر پاکستان کے ساتھ اظہار محبت کیا جاتا ہے۔ تقریب میں صدر پاکستان، وزیراعظم پاکستان اور وزیر خارجہ کے پیغامات پڑھ کر سنائے گئے۔