بدین(نمائندہ جسارت )جماعت اسلامی ضلع بدین کے نائب امیر اللہ بچایو ہالیپوٹہ نے کہا ہے کہ آزادی کشمیر کی منزل قریب آچکی ہے، اور مظلوم کشمیری پاکستان کی بقا کی جنگ لڑ رہے ہیں۔ ان خیالات کا اظہار انہوں نے سندھ ایجوکیشن فاونڈیشن حکومت سندھ کی تعاون سے چلنے والے تعلیمی ادارے پاتھ ہائی اسکول سسٹم میں کشمیر یکجہتی کے سلسلے میں منعقدہ پروگرام میں تقریر کرتے ہوئے کہا کہ بھارتی مظالم کے باوجود کشمیری عوام اپنے حقِ خودارادیت کے لیے ڈٹے ہوئے ہیں، اور ان کی قربانیاں جلد رنگ لائیں گی۔اللہ بچایو ہالیپوٹہ نے عالمی برادری سے مطالبہ کیا کہ وہ بھارت کے غیر قانونی قبضے اور کشمیریوں پر ڈھائے جانے والے مظالم کا نوٹس لے۔ انہوں نے کہا کہ پاکستان ہمیشہ کشمیری عوام کے ساتھ کھڑا رہے گا اور ان کے جائز حقوق کے حصول کے لیے ہر ممکن کوشش جاری رکھے گا۔انہوں نے مزید کہا کہ کشمیر پاکستان کی شہ رگ ہے، اور جماعت اسلامی کشمیریوں کے حقِ خودارادیت کی حمایت میں اپنی جدوجہد جاری رکھے گی۔
