سری نگر:مقبوضہ کشمیر میں بھارتی فوج کی جارحیت سے ایک اور دل دہلا دینے والا واقعہ پیش آیا ہے، جس میں 2 کشمیری نوجوانوں کو شہید کردیا گیا۔
کشمیر میڈیا سروس کے مطابق بھارتی فوج نے ضلع پونچھ میں سرچ آپریشن کی آڑ میں مقامی کشمیریوں پر ظلم و تشدد کا نیا سلسلہ شروع کیا ہے۔ قابض فوج نے داخلی اور خارجی راستے بند کر کے علاقے میں گھروں کی تلاشی لی، جہاں نہ صرف لوگوں کو ہراساں کیا گیا بلکہ خواتین کے ساتھ بھی بدسلوکی کی گئی۔
نام نہاد آپریشن کے دوران موبائل نیٹ ورک اور ٹیلی فون سروسز کو معطل کر دیا گیا تھا جب کہ ایمبولینسوں کو علاقے میں داخل ہونے کی اجازت بھی نہیں دی گئی، جس سے مقامی افراد کی مشکلات میں مزید اضافہ ہوا۔
فوج نے ایک گھر پر اندھا دھند فائرنگ کر کے 2 کشمیری نوجوانوں کو شہید کردیا۔ بعد ازاں ان کی لاشوں کو لواحقین کے حوالے کرنے کے بجائے پولیس کے حوالے کردیا گیا، جس کے بعدشہدا کے اہل خاندان لاشیں لینے کے لیے ٹھوکریں کھا رہے ہیں جب کہ بے حس بھارتی انتظامیہ ان کی راہ میں رکاوٹیں پیدا کررہی ہے۔
