واشنگٹن ائیرپورٹ کے قریب مسافر طیارہ اور فوجی ہیلی کاپٹر آپس میں ٹکرانے کے بعد دریائے پوٹومیک میں گر کر تباہ ہوگئے اور اب تک 18 لاشیں برآمد ہوئی ہیں۔
میڈیا رپورٹس کے مطابق امریکی ایئرلائن کی پرواز جو کینساس کے شہر وکیٹا سے واشنگٹن آئی تھی، دریائے پوٹومیک کے اوپر رن وے کے قریب حادثے کا شکار ہوئی۔
امریکی حکام نے بتایا کہ طیارے میں 64 مسافر سوار تھے اور حادثے کی اطلاع ملتے ہی امدادی کارروائیاں شروع کر دی گئیں۔ اب تک 18 لاشیں دریا سے نکالی جا چکی ہیں جبکہ دیگر افراد کی تلاش کا عمل جاری ہے۔
غیر ملکی خبر رساں اداروں کی رپورٹس کے مطابق تاہم تاحال کسی زندہ شخص کو نہیں نکالا گیا۔
فلائٹ ریڈار کے مطابق حادثہ مقامی وقت کے مطابق شام 5 بج کر 48 منٹ پر پیش آیا، جب طیارے کی رفتار 166 کلومیٹر فی گھنٹہ تھی۔ بمبارڈیئر CRJ700 طیارے میں 78 افراد کے بیٹھنے کی گنجائش تھی اور ٹکر کے بعد یہ طیارہ دریائے پوٹومیک میں جا گرا۔ حادثے کے فوراً بعد، غوطہ خوروں کی ٹیمیں دریا میں سرچ آپریشن کے لیے بھیج دی گئیں۔
امریکی فوجی حکام کے مطابق فوجی ہیلی کاپٹر جس سے ٹکرا کر مسافر طیارہ گر گیا، وہ بلیک ہاک ہیلی کاپٹر تھا، جس میں 3 اہلکار سوار تھے اور اس میں کوئی اعلیٰ فوجی اہلکار نہیں تھا۔
واشنگٹن ڈی سی فائر چیف کا کہنا تھا کہ امدادی کارروائیوں کے لیے حالات موافق نہیں ہیں کیونکہ خراب موسم اور شدید سردی ریسکیو آپریشن میں رکاوٹ ڈال رہے ہیں۔
