لاہور(کامرس ڈسک ) صوبائی وزیر صنعت و تجارت واوقاف چوہدری شافع حسین نے قرآن کمپلیکس کادورہ کیا،لائبریری،لیکچر ہال،خاتم النبیین یونیورسٹی کی عمارت اور دفاتر کا معائنہ کیا۔ صوبائی وزیر نے لائبریری میں کتابوں پر پڑی گرد پرسخت برہمی کا اظہار کرتے ہوئے لائبریری کی مناسب دیکھ بھال کی ہدایت کی۔صوبائی وزیر کو قرآن بورڈ میں محکمہ اوقاف ومذہبی امور کی ا سکیموں بارے بریفنگ دی گئی۔سیکرٹری اوقاف ڈاکٹر طاہر رضا بخاری نے ترقیاتی سکیموں پر پیش رفت بارے آگاہ کیا۔انہوں نے ترقیاتی سکیموں کی بروقت، شفاف اور معیاری تکمیل یقینی بنانے کی ہدایت کی اور کہا کہ ترقیاتی سکیموں کی بروقت تکمیل کیلئے فالو اپ ضروری ہے۔انہوں نے کہا کہ خاتم النبیین یونیورسٹی ناگزیر ہے اسے مکمل فعال کریں گے اور یونیورسٹی کو فعال کرکے حقیقی معنوں میں ریسرچ اور دینی علوم کی ترویج کا مرکز بنائیں گے،دینی مدارس کے طلبا کو یونیورسٹی میں رسائی دی جائے گی۔انہوں نے کہا کہ قرآن بورڈ اور متحدہ علما بورڈ کو پوری طرح متحرک کریں گے اور ان بورڈز میں معروف دینی سکالرز کو شامل کیا جائے گا۔ صوبائی وزیر نے اوقاف کے زیر اہتمام مزارات اور مساجد کی صفائی کے نظام کو بہتر بنانے کاپلان طلب کرلیا۔سیکرٹری اوقاف نے بتایا کہ قرآن بورڈ قرآن مجید کی غلطیوں سے پاک اشاعت یقینی بناتا ہے۔مقدس اوراق کی حفاظت کیلئے قرآن محل بننے چاہئیں۔
