فیصل آباد (کامرس ڈیسک) نیشنل انسٹیٹیوٹ آف پبلک ایڈمنسٹریشن پشاور میں زیر تربیت 42ویں مڈ کیریئر مینجمنٹ کورس کے شرکا نے فیصل آباد چیمبر آف کامرس اینڈانڈسٹری کا دورہ کیا۔اس موقع پر صدر فیصل آباد چیمبر آف کامرس اینڈانڈسٹری ریحان نسیم بھراڑہ نے انہیں فیصل آباد اور فیصل آباد چیمبر کے بارے میں آگاہ کیا اور بتایا کہ پائیدار معاشی ترقی کیلئے پالیسی سازی میں سٹیک ہولڈرز کی مشاورت اور پالیسیوں کا تسلسل ضروری ہے۔انہوں نے کہا کہ پاکستان کسی وقت جرمنی اور چین جیسے ملکوں کو قرض دیتا تھا اور ہمارا شمار دنیا کی 20،25اہم ترین معیشتوں میں ہوتا تھا مگر غلط فیصلوں کی وجہ سے آج ہمیں مشکلات کا سامنا کرنا پڑ رہا ہے۔ انہوں نے کہا کہ حکومت کو معاشی سمت درست کرنے کیساتھ ساتھ اکنامک ایمرجنسی کے ذریعے معیشت کی بحالی کیلئے طویل المدتی حکمت عملی وضع کرنا ہو گی۔اس سے قبل نیپا پشاور کے فیکلٹی ممبر شبید اللہ وزیر نے شرکا کا تعارف کرایا اور کہا کہ ترقی کیلئے نجی شعبہ کو اپنا کردار ادا کرنا ہوگاجبکہ حکومت کاکام کاروبار کیلئے ساز گار ماحول پیدا کرنا، امن وامان کی بحالی اور انصاف کی فراہمی ہے۔
