سانگھڑ (نمائندہ جسارت) جماعت اسلامی ضلع سانگھڑ کے مقامی و ضلعی امراء کا اجلاس امیر جماعت اسلامی ضلع سانگھڑ رفیق منصوری کی زیر صدارت منعقد ہوا، اجلاس میں قرار داد کے ذریعے گزشتہ روز چوٹیاری تھانے کی حد میں ہونے والے 3 افراد کے قتل کی مذمت کرتے ہوئے حکومت سے مطالبہ کیا گیا کہ قاتلوں کی حمایت کرکے کوئی بھی حکومت زیادہ عرصہ اقتدار میں نہیں رہ سکتی، کوئی چاہے کتنا بھی طاقتور کیوں نہ ہو لیکن ظلم خالق کائنات کو بالکل پسند نہیں، اس لیے حکومت ہوش کے ناخن لے، قاتلوں کے خلاف فوری ایف آئی آر درج کر کے قاتلوں کو گرفتار کیا جائے۔ قرارداد میں کہا گیا ہے کہ سانگھڑ شہر کی حالت دیکھ کر لگ رہا ہے کہ حکومت قاتلوں کے سامنے بالکل بے بس ہو چکی ہے، پورا شہر سراپا احتجاج ہے، کاروباری مراکز، شہر روڈ راستے ٹریفک بند ہونے کے باجود حکومت اور پولیس فورس ٹس سے مس ہونے کے لیے تیار نہیں، آئی جی سندھ، وزیر اعلیٰ و اعلیٰ اختیاراتی ادارے مذکورہ واقعے کا نوٹس لیں اور سانگھڑ کے مظلوم عوام کو انصاف فراہم کریں، جماعت اسلامی ضلع سانگھڑ کے اجلاس میں مقامی جماعتوں کی کارکردگی رپورٹ کا جائزہ اور فیصلہ کیا گیا کہ کام کی رفتار کو تیز کیا جائے گا، کارکن سازی میں اضافہ ہو گا اور قوم کو ظلم کے خلاف اور اسلامی نظام کے غلبے کے لیے منظم اور بیدار کیا جائے گا۔
