گوادر (نمائندہ جسارت) سول سوسائٹی گوادر کے صدر محمد جان بلوچ، جنرل سیکرٹری محمد عارف، فنانس سیکرٹری کامریڈ محمد حنیف اوراعجاز دشتی و دیگر نے گوادر پریس کلب گوادر کے محمد اسماعیل بلوچ ہال میں پریس کانفرنس سے کرتے ہوئے کہاکہ سول سوسائٹی شہر کا اہم ترین اسٹک ہولڈر ہے۔ ہم تعلیم، صحت، اسپورٹس سمیت ہر شعبے میں خدمات سرانجام دے رہے ہیں گوادر کے نوجوان جو تعلیم یافتہ ہیں وہ بے روزگار ہیں گریجویٹ نوجوان چوکیدار کے لئے درخواستیں دے رہا ہے۔ محکمہ صحت کی آسامیوں پر مقامی قابل اور تجربہ کار اور میر عبدالغفور کلمتی ٹیچنگ اسپتال میں رضاکارانہ طور پر کام کرنے والے نوجوانوں کو بھرتی کیا جائے۔ اسپتال کی ٹیکنیکل آسامیوں کو اسپتال میں کام کرنے والے ٹیکنیکل نوجوانوں کو دی جائیں۔ محکمہ پی ایچ ای اور جیڈا میں ٹیسٹ و انٹرویو کے دوران ضابطے کو فالو نہیں کیا گیا۔ ضلع گوادر کے دور دراز کے علاقوں سے نوجوان گوادر میں بہتر مستقبل کے لئے سفر کرکے ٹیسٹ و انٹرویو دینے آتے ہیں لیکن ان کو مایوس کیا جاتا ہے۔ ضلع انتظامیہ سمیت متعلقہ اداروں کے ذمے داران اس حوالے سے سنجیدگی کا مظاہرہ کریں۔ گوادر کے نوجوانوں کے اندر روزگار سے متعلق ایک لاوہ پک رہا ہے جو کہ اداروں کے لئے نقصاندہ ہے۔
