کراچی(بزنس رپورٹر)بائر فاؤنڈیشن اور پولا فاؤنڈیشن نے گزشتہ ہفتے سوئٹزرلینڈ کے شہر ڈیووس میں عالمی اقتصادی فورم میں اعلان کیا کہ وہ سال 2030ء تک پاکستان، بنگلہ دیش، ملاوی، گھانا، نائیجیریا، کینیا اور مالی میں وہاں کی مقامی حکومتوں کے ساتھ مل کرایک کروڑ چھوٹے کاشتکاروں کوبیمے کا تحفظ فراہم کرنے کا ارادہ رکھتے ہیں۔دونوں اداروں کے درمیان اس تعاون کا مقصد ان ممالک میں چھوٹے کاشتکاروں کی موسمیاتی تبدیلیوں کا مقابلہ کرنے کی صلاحیت کو بہتر بنانا ہے تاکہ انہیں خشک سالی اور سیلاب کے بڑھتے ہوئے اثرات سے محفوظ رکھا جا سکے، جو ان کی فصلوں، روزگار اور عالمی غذائی تحفظ کے لیے خطرہ بن رہے ہیں۔ اس کی بدولت نجی اور عوامی تعاون کو فروغ دینے اور افریقہ اور ایشیا میں زراعت کے لیے بیمہ کی مارکیٹ کے قیام و فروغ میں بھی مدد ملے گی۔بائر پاکستان کے منیجنگ ڈائریکٹر اور چیف ایگزیکٹو آفیسر احمد علی نے کہا کہ پاکستان میں چھوٹے کاشتکاروں کو موسمیاتی آفات، مثلاًسال2022ء میں سیلاب کے پیش نظر شدید اقتصادی مشکلات کا سامنا کرنا پڑا جس سے فصلوں اور انفراسٹرکچر کو غیر معمولی نقصان پہنچا۔ ہم پولا فاؤنڈیشن کے تعاون سے بائر فاؤنڈیشن کے اس بروقت اور متعلقہ اقدام کا خیر مقدم کرتے ہیں جو ہمارے چھوٹے کاشتکاروں کومشکل حالات سے نمٹنے کو یقینی بنائے گا۔
