حیدرآباد (اسٹاف رپورٹر) لیاقت یونیورسٹی اسپتال حیدرآباد/ جامشورو میں قائم ریڈیولاجی ڈپارٹمنٹ میں علاج کی جدید ترین سہولیات کے ساتھ مریضوں کی مالی حالت کے پیش نظر رعایتی خدمات بھی فراہم کی جا رہی ہیں جس کے تحت ریڈیولاجی ڈپارٹمنٹ میں ایم آر آئی، سی ٹی اسکین، الٹرا سائونڈ اور ایکسرے کی 24 گھنٹے سہولت موجود ہے تاکہ ہر فرد کو صحت کی بہتر سہولتیں میسر آ سکے۔ یہ بات چیئرمین ریڈیولاجی ڈپارٹمنٹ لیاقت یونیورسٹی اسپتال حیدرآباد/ جامشورو ڈاکٹر عدنان احمد قریشی نے اپنے بیان میں کہی۔ انہوں نے کہا کہ ہمارے ڈپارٹمنٹ میں جدید قسم کی سہولیات موجود ہیں، جن میں ایم آر آئی اور اعلیٰ قسم کی سی ٹی اسکین مشینیں ہیں جو پورے سندھ میں کہیں موجود نہیں، اس کے علاوہ الٹرا سائونڈ کی جدید مشینوں سمیت ایکسرے، فلورو اسکوپی اور میمو گرافی کی ڈیجیٹل مشینیں بھی مریضوں کے لیے 24 گھنٹے کام کر رہی ہیں اور یہ تمام ٹیسٹ پرائیویٹ اسپتالوں اور لیبارٹریوں کے مقابلے میں سے انتہائی کم ریٹ میں کیے جاتے ہیں جبکہ اسپتال میں داخل زیر مریضوں کے لیے یہ ٹیسٹ بالکل مفت ہیں۔ ڈاکٹر عدنان احمد قریشی نے کہا کہ وائس چانسلر لمس پروفیسر ڈاکٹر اکرام الدین اُجن اور اے ڈی ایس لیاقت یونیورسٹی اسپتال حیدرآباد ڈاکٹر آفتاب حسین فل کی قیادت میں اسپتال اورریڈیولاجی ڈپارٹمنٹ میں مختلف شعبوں میں اصلاحات کی گئی ہیں۔
