کوٹری (جسارت نیوز) پولیس کی بروقت کارروائی، بینک منیجر کے گھر سے چھینی گئی موٹر سائیکل برآمد کر لی گئی، ملزمان رات کی تاریکی کا فائدہ اُٹھاتے ہوئے فرار، ایس ایس پی جامشورو کا ایس ایچ او اور ان کی ٹیم کو تعریفی سرٹیفکیٹ دینے کا اعلان۔ تفصیلات کے مطابق شیرازی محلے سے ایچ بی ایل کے منیجر وزیر خان کے گھر کے باہر سے مسلح افراد ان کے صاحبزادے سے نئی موٹر سائیکل چھین کر فائرنگ کرتے ہوئے فرار ہوئے جس کی اطلاع فوری ایس ایچ او ارسلاح خان کو دی گئی جس پر پولیس نے فوری ناکہ بندی کرتے ہوئے مسلح افراد کا تعاقب کیا جس پر مسلح افراد موٹر سائیکل تھارو شاہ قبرستان کے قریب چھپا کر فرار ہوگئے۔ پولیس نے موٹر سائیکل برآمد کرکے علاقے کا سرچ آپریشن بھی کیا لیکن ملزمان رات کی تاریکی کا فائدہ اُٹھاتے ہوئے فرار ہو گئے۔ پولیس کی بہترین کارروائی پر متاثرہ شخص نے پولیس سے اظہارِ تشکر کیا۔ ایس ایچ او کے مطابق ملزمان کی تلاش جاری ہے، جلد ملزمان کا سراغ لگا لیا جائے گا، امن و امان کی صورتحال برقرار رکھنا ہماری اولین ترجیحات میں شامل ہے۔ ایس ایس پی جامشورو ظفر صدیق نے پولیس کی بہترین کارکردگی پر تعریفی سرٹیفکیٹ دینے کا اعلان کیا ہے۔
