ایران کے نائب صدر جواد ظریف نے امید ظاہر کی ہے کہ امریکا کے صدر ڈونلڈ ٹرمپ ایران سے تعلقات میں معقولیت کا مظاہرہ کریں گے۔ ڈیووس (سوئٹزر لینڈ) میں ورلڈ اکنامک فورم سے خطاب کرتے ہوئے جواد ظریف نے کہا کہ ایران کو کسی بھی اعتبار سے عالمی امن و سلامتی کے لیے خطرہ قرار دینا بالکل غلط اور بے بنیاد ہے۔
ایرانی نائب صدر برائے اسٹریٹجک افیئرز کا کہنا تھا کہ عالمی امن کے لیے خطرہ بننے والی تنظیموں اور گروپوں کے لیے کارروائیاں درست ہیں مگر اِن گروپوں کو زندگی اور توانائی بخشنے والے حالات کی روک تھام بھی تو کی جانی چاہیے۔
جواد ظریف کا کہنا تھا کہ ایران کے بارے میں پروپیگنڈا کیا جارہا ہے کہ وہ ایٹمی ہتھیار تیار کرنے میں مصروف ہے جبکہ ایسا کچھ بھی نہیں ہے۔ ایران ایٹمی توانائی کے ذریعے اپنے ہاں توانائی کا مسئلہ حل کرنا چاہتا ہے۔ ایران کو عالمی امن کے لیے خطرہ قرار دینے والے ملکوں کو اپنے گریبان میں جھانک کر دیکھنا چاہیے، جواب اُنہیں مل جائے گا۔
ایرانی نائب صدر نے امید ظاہر کی کہ اپنے دوسرے عہدِ صدارت میں ڈونلڈ ٹرمپ زیادہ سنجیدگی کا مظاہرہ کریں گے اور دنیا کو لاحق خطرات کا گراف نیچے لانے میں کلیدی کردار ادا کریں گے۔ ان کا یہ بھی کہنا ہے کہ دنیا کو امن کی ضرورت ہے اور امریکا سمیت تمام ترقی یافتہ ممالک کو اس حوالے سے اپنا کردار ادا کرنا ہوگا۔
