وفاقی وزیر اطلاعات و نشریات عطا تارڑ نے کہا ہے کہ 190 ملین پاؤنڈ کا کرپشن اسکینڈل ملک کی تاریخ کا سب سے بڑا اسکینڈل ہے۔
اسلام آباد میں پریس کانفرنس کرتے ہوئے وفاقی وزیر اطلاعات و نشریات عطا تارڑ نے کہا کہ بانی پی ٹی آئی ڈیل کرنا چاہتے ہیں، کرپشن پر کوئی ڈھیل نہیں ملے گی ،آزاد مبصرین بھی اس اسکینڈل پر کسی کو بری الذمہ قرار نہیں دے رہے، یہ اسکینڈل ملکی تاریخ کے سب سے بڑے کرپشن واقعات میں شمار ہوتا ہے۔
عطا تارڑ نے اس بات پر زور دیا کہ پاکستان کی معیشت اب درست سمت میں گامزن ہے، مہنگائی میں نمایاں کمی آئی ہے، اور عالمی اقتصادی فورم کی رپورٹ نے پاکستان کی معیشت پر اعتماد کا اظہار کیا ہے۔ انہوں نے کہا کہ ملک کو دیوالیہ ہونے کا کوئی خطرہ نہیں ہے۔
وزیر اطلاعات نے یہ بھی بتایا کہ برطانیہ کی نیشنل کرائم ایجنسی (این سی اے) نے وزیراعظم شہباز شریف کو بے گناہ قرار دیا تھا اور اسی ایجنسی نے 190 ملین پاؤنڈ ضبط کر کے پاکستان کے حوالے کیے۔
عطا تارڑ نے مزید کہا کہ پی ٹی آئی سے سوال ہے کہ اگر یہ پیسہ عوامی یا سرکاری خزانے کا نہیں تھا تو پھر برطانیہ نے اسے پاکستان کے حوالے کیوں کیا؟ انہوں نے عمران خان کے حوالے سے کہا کہ وہ دعویٰ کرتے ہیں کہ ان کے پاس کوئی ذریعہ آمدن نہیں، تو پھر زمان پارک میں 25 کروڑ روپے کا نیا گھر کیسے بنایا گیا؟
انہوں نے کہا کہ وہ اپنے سیاسی کریئر میں کابینہ میں کبھی بھی بند لفافہ نہیں دیکھتے، بلکہ ہر ایجنڈے پر کھل کر بحث ہوتی ہے۔ ان کا کہنا تھا کہ کرپشن کے ذریعے ہیرے، جواہرات خریدے گئے اور قوم کے اربوں روپے لوٹے گئے، جس کا حساب دینا ہوگا۔
عطا تارڑ نے کہا کہ مذاکرات کے عمل میں پیش رفت ہو رہی ہے، لیکن کرپشن کے معاملات میں کوئی رعایت نہیں دی جائے گی۔
انہوں نے یہ بھی کہا کہ عمران خان ڈیل کرنا چاہتے ہیں اور اپنے لوگوں سے کہتے ہیں کہ انہیں جیل سے باہر نکالا جائے۔ سابق وزیراعظم کے معاون خصوصی برائے داخلہ اور احتساب، مرزا شہزاد اکبر کو دعوت دی کہ وہ پاکستان واپس آئیں، مگر انہیں کیسز کا سامنا کرنے کا حوصلہ نہیں ہے۔
