گوادر(نمائندہ جسارت) گزشتہ روز گوادر میں شہید ہونے والے نوجوان زکریا یعقوب کی یاد میں کینڈل بردار ریلی نکالی گئی۔ ریلی کا آغاز بی اینڈ آر چوک میرین ڈرائیو سے مارچ کرتے ہوئے دی اویس اسکول گوادر کی گلی جہاں زکریا یعقوب کو فائرنگ کرکے شہید کیا گیا تھا وہاں تک ہوا۔ ریلی میں کثیر تعداد میں خواتین اور بچے بھی شریک تھے جنہوں نے زکریا یعقوب کو خراج عقیدت پیش کرنے کے لئے اپنے ہاتھوں میں موم بتیاں اور زکریا یعقوب کے پورٹریٹ اٹھائے رکھے تھے۔ اس موقع پر گوادر کے گلوکار سمیر رحیم نے نظم سناکر زکریا یعقوب کو خراج عقیدت پیش کیا۔ یاد رہے کہ زکریا یعقوب کو تین دن قبل نامعلوم افراد نے گولیاں مارکر شہید کردیا تھا۔ زکریا یعقوب لیویز فورس کے حاضر سروس اہلکار بھی تھے جب کہ وہ کچھ عرصہ قبل گمشدگی کا بھی شکار بنے جسے بعد میں چھوڑ دیا گیا تھا۔
