کراچی (اسٹاف رپورٹر) کراچی میں انٹرمیڈیٹ سال اول کے پرچوں کی اسکروٹنی پر عاید فیس ختم کردی گئی۔ اعلیٰ ثانوی تعلیمی بورڈ کراچی نے انٹرمیڈیٹ حصہ اول کے سالانہ امتحانات برائے 2024ء کے سائنس پری میڈیکل، پری انجینئرنگ، سائنس جنرل، کامرس پرائیویٹ، آرٹس پرائیویٹ اور ہوم اکنامکس گروپس کے نتائج سے غیر مطمئن طلبہ کے لیے پرچوں کی اسکروٹنی فیس ختم کرنے کا اعلان کردیا ہے۔ طلبہ کو سہولت فراہم کرنے کے لیے انٹربورڈ کی انکوائری پر طلبہ کے لیے جبکہ سہولت مرکزپر طالبات کے لیے خصوصی کاؤنٹرز قائم کردیے گئے ہیں تاکہ طلبہ کواسکروٹنی فارم جمع کرانے میں کسی مشکل کا سامنا نہ کرنا پڑے۔ ناظم امتحانات کو اسکرٹنی 30 روز میں مکمل کرنے کے لیے ہدایات جاری کردی گئی ہیں۔ طلبہ اسکروٹنی فارم www.biek.edu.pk سے ڈاؤن لوڈ کرسکتے ہیں۔ انٹرمیڈیٹ حصہ اول کے سالانہ امتحانات برائے 2024ء کے نتائج پر طلبہ کی شکایت کے ازالے کے لیے سینئر اساتذہ پر مشتمل انکوائری کمیٹی بھی تشکیل دی جا چکی ہے۔
